བཅོམ་ལྡན་འདས་ཕྱི་མའི་དུས་དང་ཕྱི་མའི་དུས་སུ་བསྟན་པ་རྣམ་པར་འཇིག་པར་འགྱུར་བ་ན། གང་འདི་ཁྲོ་བོའི་རྒྱལ་པོ་གཤིན་རྗེ་གཤེད་ཀྱི་ཆོ་ག་ཇི་ལྟ་བ་བཞིན་གསུངས་པ་རབ་ཏུ་སྦྱར་ན་དེ་ལ་གྲུབ་པར་འགྱུར་ཏེ། ངེས་པར་རྒྱལ་པོ་མ་རུངས་པ་བསྟན་པ་ལ་གནོད་པ་བྱེད་པ་དང་། སེམས་ཅན་ཕྱོགས་ཆེན་པོ་དང་ལྡན་པ་དང་སྤྲོ་བ་ཆེན་པོ་དང་ལྡན་པ་རྣམས་ཚར་གཅད་པ་དང་རྗེས་སུ་གཟུང་བ་ལ་རབ་ཏུ་ཞུགས་པ་དང་སྙིང་རྗེ་ཆེན་པོ་དང་བྲལ་བ་དེ་དག་ལ་ཁྲོ་བོའི་རྒྱལ་པོ་འདི་རབ་ཏུ་སྦྱར་བར་བྱའི་གཞན་དག་ལ་ནི་མ་ཡིན་ནོ། །དེ་ནས་བཅོམ་ལྡན་འདས་ཅང་མི་གསུང་བར་གྱུར་ཏེ། སངས་རྒྱས་ཀྱི་རྣམ་པར་འཕྲུལ་བའི་བའི་བྱིན་གྱིས་རླབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །འཇམ་དཔལ་གཞོན་ནུར་གྱུར་པའང་ཅང་མི་སྨྲ་བར་གནས་པར་གྱུར་ཏོ། །ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ཡང་རྣམ་པ་དྲུག་ཏུ་རབ་ཏུ་འགུལ་བར་གྱུར་ཏོ། །ལྷ་ཚོགས་དག་ཀྱང་འཇིགས་པར་གྱུར། །བྱིས་པ་ཀུན་ཀྱང་རབ་ཏུ་དངངས། །ལྷ་རྣམས་ཀུན་དང་ཀླུ་དག་དང་། །ལྷ་མིན་དབང་དང་མ་མོར་བཅས། །གཟའ་རྣམས་ཀུན་གྱི་གཙོ་བོ་དང་། །ལྷ་ཚོགས་མི་དང་བཅས་པ་དང་། །མ་རུངས་སེམས་ལྡན་སྲུལ་པོ་དག །རབ་འགུལ་ཡིད་ནི་མི་བརྟན་གྱུར། །མི་ཡི་བདག་པོ་གདུག་ལྡན་སེམས། །དེ་དག་ཉམ་ཐག་འཇིགས་པར་གྱུར། །ཆོས་ཀྱི་རྒྱལ་པོའི་བསྟན་པ་ལ། །དེ་ཚེ་དེ་དག་སྐྱབས་སུ་སོང་། །གནོད་སྦྱིན་གསང་བའི་བདག་པོ་ནི། །འོད་ཆེན་ཕྱག་ན་རྡོ་རྗེ་དང་། །གཞོན་ནུར་གྱུར་པའི་སྔགས་རྒྱལ་དང་། །འཇམ་དཔལ་དབྱངས་ལའང་དེ་འཇིགས་ནས། །འཇམ་པའི་དབྱངས་ཀྱི་དྲུང་དུ་ནི། །དེ་ཚེ་དེ་དག་དམ་ཚིག་བླངས། །མ་རུངས་སྔགས་ནི་མི་བཟད་པས། །ཀྱེ་མ་བདག་ཅག་ངེས་བསྲེག་ཅིང་། །དེ་རིང་ཁྲོ་བོས་བརྒྱལ་འགྱུར་ཞིང་། །ས་ཡི་སྟེང་དུ་འགྱེལ་འགྱུར་བས། །སེམས་ཅན་ཐུགས་ལ་ཐུགས་བརྩེ་བས། །ཡོངས་སུ་བསྐྱབ་ཅིང་བསྲུང་དུ་གསོལ། །དེ་ནས་འོད་ཆེན་བྱིས་པའི་གཟུགས། །བྱང་ཆུབ་སེམས་དཔའ་དེས་སྨྲས་པ། །ལྷ་དང་གནོད་སྦྱིན་སྲིན་པོ་དང་། །ལྷ་མིན་ཐམས་ཅད་མ་འཇིགས་ཤིག །མི་དང་མི་མ་ཡིན་པ་དང་། །འབྱུང་པོ་མ་ལུས་ལྷ་རྣམས་ཀུན། །ཁྱོད་ཀྱི་དམ་ཚིག་ངས་བཤད་བསྲུང་། །རྟག་ཏུ་བྱམས་སེམས་གྱུར་ནས་ནི། །