རྟག་ཏུ་རང་གི་སྔགས་ཀྱང་དྲན། །ཤཱཀྱ་སེང་གེ་མི་ཡི་མཆོག །རྐང་གཉིས་མཆོག་ནི་རྫོགས་སངས་རྒྱས། །དེ་ཉིད་ཀྱིས་གསུང་སྔགས་དང་ནི། །གཙུག་ཏོར་སྤྱན་ལ་སོགས་པའོ། །འཇིག་རྟེན་གསུམ་ལ་འཁོར་ལོ་རྒྱལ། །གཟི་བརྗིད་ཕུང་པོ་དམ་པ་རྒྱལ། །རྣམ་རྒྱལ་གཙུག་ཏོར་གསང་སྔགས་དང་། །ཕྱག་ན་པདྨ་རྣམ་གཟིགས་དང་། །ཀུན་ཏུ་གཟིགས་པའི་མགོན་པོ་དང་། །ཁྲོ་གཉེར་སྒྲོལ་མ་གྲགས་ལྡན་མ། །ལྷ་མོ་གོས་དཀར་མོ་དང་ནི། །དཀར་ཆེན་མ་དང་སྙན་ལྡན་མ། །རིགས་མ་ལོངས་སྤྱོད་ལྡན་མ་དང་། །རྟ་མགྲིན་སྔགས་ཀྱི་རྒྱལ་པོ་དང་། །དེ་དག་པདྨའི་རིག་སྔགས་དང་། །གཙོར་ནི་རྒྱལ་བས་གསུང་བ་དང་། །ཡི་གེ་གཅིག་དང་འཁོར་ལོས་སྒྱུར། །སྔགས་རྣམས་བདག་པོའི་མངའ་བདག་དང་། །འོད་ཆེན་སྔགས་ཀྱི་མགོན་པོ་ནི། །འདི་དག་དེ་བཞིན་དྲན་པར་གྱིས། །གཤིན་རྗེ་གཤེད་ཅེས་བྱ་བ་ཡི། །ཁྲོ་བོའི་གཙོ་བོ་དེ་ཡང་དྲན། །མགོན་པོ་སྤྱན་རས་གཟིགས་པ་ཡི། །ཐུགས་ནི་ཐུགས་རྗེ་བྱུང་བ་དང་། །ཐུགས་རྗེ་ཆེན་པོས་ཐུགས་བརླན་པར། །སངས་རྒྱས་སྔ་མས་གསུངས་པའང་དྲན། །སྒྲོལ་མ་སྐྱེ་བོ་སྒྲོལ་བར་ནི། །སྤྱན་རས་གཟིགས་ཀྱིས་གསུངས་པ་དང་། །རྟག་དང་ཏིང་འཛིན་སྐྱེས་འཕགས་མ། །མིང་གི་གཟུགས་ནི་བསྟན་པའང་ཡིན། །བྱང་ཆུབ་སེམས་བཞིན་སྤྱོད་པ་སྟེ། །བྱང་ཆུབ་སྤྱོད་བྱེད་དམ་པའང་ཡིན། །འཇིག་རྟེན་ཁམས་ནི་སྟོང་དག་ཏུ། །གྲངས་མེད་རྣམ་པ་མང་པོར་ཡང་། །སེམས་ཅན་རྣམས་ལ་ཕན་པའི་ཕྱིར། །དེ་ཚེ་ལྷ་མོ་རྒྱུ་བར་བྱེད། །བུད་མེད་གཟུགས་ནི་བཟུང་ནས་ཀྱང་། །སྔགས་ཀྱི་ཚུལ་གྱིས་ལུས་ཅན་ལ། །དེ་ཚེ་སེམས་ཅན་འདུལ་བྱེད་ཅིང་། །བྱང་ཆུབ་ཐེག་པར་སྦྱོར་བར་བྱེད། །བྱང་ཆུབ་སེམས་དཔའི་སྤྱོད་པ་ནི། །བསམ་ཞིང་བསྟན་པར་མི་ནུས་སོ། །ཕྱག་ན་རྡོ་རྗེ་དཔའ་བོ་ནི། །སྔགས་རྣམས་ཀུན་གྱི་བདག་པོའང་དྲན། །བདག་མ་རིག་འཛིན་ལྷ་མོ་ནི། །འཇིག་རྟེན་གསུམ་གྱིས་རབ་མཆོད་དང་། །ལུ་གུ་རྒྱུད་དང་འོག་བག་མ། །རྡོ་རྗེ་ཁུ་ཚུར་སྙན་ལྡན་མ། །ཁྲོ་དབང་ཐིག་ལེ་དཀར་མོ་དང་། །དབྱུག་སྔོན་འཇིགས་པར་བྱེད་དང་བཅས། །འདི་དག་ཁྲོ་མོ་ཕོ་ཉའི་ཚོགས། །