།མཆོག་དང་ཐ་མ་བར་མ་ཡི། །དེར་ཡང་ལས་ནི་རབ་སྦྱར་བྱ། །ཞི་བས་སངས་རྒྱས་བྱང་ཆུབ་འགྱུར། །རྒྱས་པ་ཡིས་ནི་རང་རྒྱལ་ཏེ། །གཞན་པ་ཕྲན་ཚེགས་ལས་ཀྱིས་ནི། །ཉན་ཐོས་ཀྱི་ནི་བྱང་ཆུབ་བརྗོད། །དེ་ནི་རྣམ་གསུམ་དབྱེ་བ་སྟེ། །དེར་ཡང་སེམས་ནི་བལྟ་བར་བྱ། །མང་པོར་ཡང་ནི་དབྱེ་བྱ་སྟེ། །གྲངས་མེད་པར་ཡང་དབྱེ་བས་སོ། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས་ཕྱག་རྒྱ་དང་། སྔགས་དང་། ལས་ཐམས་ཅད་དང་ངེས་པར་སྡོམ་པའི་ལེའུ་རབ་འབྱམ་ལས་སུམ་ཅུ་རྩ་གཉིས་པ་རྫོགས་སོ།། །།དེ་ནས་གནོད་སྦྱིན་གྱི་སྡེ་དཔོན་ཕྱག་ན་རྡོ་རྗེ་འཁོར་དེར་འདུས་པར་གྱུར་ཏེ། འདུག་པ་དེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པའི་ཁྲོ་བོའི་རྒྱལ་པོ་གཤིན་རྗེའི་གཤེད་ཅེས་བྱ་བས་བཤད་པ་དེའི་ཆོ་ག་རྒྱ་ཆེ་བ་བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གཞོན་ནུར་གྱུར་པ་ལའང་བཀའ་མ་སྩལ་བས། བཅོམ་ལྡན་འདས་བདག་དང་ཕྱི་མའི་སྐྱེ་བོ་ལ་གཟིགས་ནས། བཅོམ་ལྡན་འདས་ཡོངས་སུ་མྱ་ངན་ལས་འདས་ཏེ། བསྟན་པ་ནུབ་པའི་དུས་ལ་བབ་སྟེ། འཇིགས་པ་ཆེན་པོ་རྩོད་པའི་དུས་ཐ་མ་ལ་ཉན་ཐོས་དང་རང་སངས་རྒྱས་དག་མེད་པ་ན། སངས་རྒྱས་ཀྱི་ཞིང་དུ་དེ་བཞིན་གཤེགས་པའི་བསྟན་པ་ཡང་དག་པར་བསྲུང་བའི་ཕྱིར་དང་། ཆོས་ཀྱི་ཁམས་ཡུན་རིང་དུ་གནས་པར་བྱ་བའི་ཕྱིར་དང་། རྒྱལ་པོ་མ་རུངས་པ་ཐམས་ཅད་བཟློག་པའི་ཕྱིར་དང་། དཀོན་མཆོག་གསུམ་ལ་གནོད་པ་བྱེད་པ་དག་ཚར་གཅད་པའི་ཕྱིར་དང་། གདུལ་བྱའི་སེམས་ཅན་ལ་བསམ་གྱིས་མི་ཁྱབ་པའི་ཐབས་མཁས་པ་བསྟན་པའི་ཕྱིར་དང་། བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱ་བའི་ཕྱིར་དང་། བསམ་གྱིས་མི་ཁྱབ་པའི་སེམས་ཅན་ཡོངས་སུ་སྨིན་པ་མངོན་པར་བསྒྲུབ་པའི་ཕྱིར་དང་། བཅོམ་ལྡན་འདས་ཕྱི་མའི་དུས་དང་ཕྱི་མའི་དུས་སུ་བསྟན་པ་རྣམ་པར་འཇིག་པར་འགྱུར་བ་ན།