Degé Kangyur volume 88, F.105.a

༄༅༅། །​རྒྱ་གར་སྐད་དུ། ཨཱརྱ་མཉྫུ་ཤྲཱི་མཱུ་ལ་ཏནྟྲ། བོད་སྐད་དུ། འཕགས་པ་འཇམ་དཔལ་གྱི་རྩ་བའི་རྒྱུད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །​འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གནས་གཙང་མའི་སྟེང་གི་ནམ་མཁའི་དཀྱིལ་ན། བྱང་ཆུབ་སེམས་དཔའ་འདུས་པའི་འཁོར་གྱི་ཚོགས་སོ་སོ་ཐ་དད་པ་བསམ་གྱིས་མི་ཁྱབ་པ་ངོ་མཚར་རྨད་དུ་བྱུང་བ། སོ་སོར་རབ་ཏུ་གནས་པ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་གནས་གཙང་མའི་རིས་ཀྱི་ལྷའི་བུ་རྣམས་ལ་བཀའ་སྩལ་པ། ལྷའི་བུ་དག་ཁྱེད་ཅག་ཉོན་ཅིག །​བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པའི་ཆོ་འཕྲུལ་གྱི་སྤྱོད་པ་བསམ་གྱིས་མི་ཁྱབ་པ་ངོ་མཚར་རྨད་དུ་བྱུང་བའི་ཏིང་ངེ་འཛིན་གྱི་བྱེ་བྲག་དང་། རྫུ་འཕྲུལ་དང་། རྣམ་པར་ཐར་པའི་དཀྱིལ་འཁོར་བྱང་ཆུབ་སེམས་དཔའི་རྣམ་པར་འཕྲུལ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཉེ་བར་འཚོ་བ། ཚེ་དང་ནད་མེད་པ་དང་དབང་ཕྱུག་དང་། ཡིད་ལ་བསམ་པ་ཡོངས་སུ་རྫོགས་པར་བྱེད་པའི་སྔགས་ཀྱི་གཞི་དག་སེམས་ཅན་རྣམས་ལ་ཕན་པའི་ཕྱིར་བཤད་པར་བྱ་སྟེ། དེ་ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་བཤད་པར་བྱའོ། །​དེ་ནས་གནས་གཙང་མའི་རིས་ཀྱི་ལྷའི་བུ་དེ་དག་གིས་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ལེགས་སོ་ཞེས་གསོལ་ཏེ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཏིང་ངེ་འཛིན་གྱི་ཁྱད་པར་དང་། ས་ཆེན་པོ་ཐོབ་པར་བྱ་བ་དང་། རྡོ་རྗེའི་གདན་གནོན་པ་དང་། བདུད་གདུལ་བ་དང་། ཆོས་ཀྱི་འཁོར་ལོ་བསྐོར་བ་དང་། ཉན་ཐོས་དང་རང་སངས་རྒྱས་ཐམས་ཅད་ཀྱི་ངེས་པར་འབྱུང་བ་དང་། ལྷ་རྣམས་དང་མི་རྣམས་སུ་སྐྱེ་བར་བྱ་བ་དང་། སྡུག་བསྔལ་དང་། དབུལ་བ་དང་། ནད་ཐམས་ཅད་ཞི་བར་བྱེད་པ། ལོངས་སྤྱོད་ཀྱིས་ཕྱུག་པ་འདྲེན་པར་བྱེད་པ། འཇིག་རྟེན་དང་འཇིག་རྟེན་ལས་འདས་པའི་སྔགས་ཀྱི་སྤྱོད་པས་ཕོངས་པར་མི་བྱེད་པ། རེ་བ་ཐམས་ཅད་ཡོངས་སུ་རྫོགས་པར་བྱེད་པ་དེ་བཞིན་གཤེགས་པ་ཐམས་ཅད་ཀྱི་གསུང་འབྲས་བུ་མེད་པར་བྱེད་པ་མ་ཡིན་པ། བཅོམ་ལྡན་འདས་ཀྱིས་བྱམས་པའི་ཐུགས་དང་། ཕན་པའི་ཐུགས་དང་བདག་དང་སེམས་ཅན་ཐམས་ཅད་ལ་ཐུགས་བརྩེ་བ་ཉེ་བར་བཟུང་ནས་བཅོམ་ལྡན་འདས་དེ་བཤད་དུ་གསོལ།



The English translation of this folio by 84000 - Translating the words of the Buddha can be found at:
https://read.84000.co/translation/toh543.html?part=UT22084-088-038-18916#UT22084-088-038-18916