རིགས་ཀྱི་བུ་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་དེ་ནི་འདི་ཡིན་ཏེ། མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས། སྡུག་བསྔལ་གྱི་ཁུར་འདོར་བར་བྱེད་པའི་བར་ཡིན་ནོ། །ལོང་ལ་སངས་རྒྱས་ཀྱི་ཞིང་མི་མཇེད་དུ་སོང་ཤིག །ངའི་བཀས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་གནོད་པ་ཆུང་ངམ་ཞེས་བྱ་བ་ནས། གང་ལ་ལ་སངས་རྒྱས་ཀྱི་ཡུལ་འདིར་ཆོས་མ་ལགས་པའི་འཁོར་ལོ་བསྐོར་བ་དེ་ལ་ཡང་དེ་བཞིན་གཤེགས་པ་རི་དབང་རྒྱལ་པོ་དེས་ཉི་མའི་སྙིང་པོའི་ཆོས་ཀྱིས་གནས་པ་ཀླུའི་ཡུལ་རྣམ་པར་འཇིག་པར་མཛད་པའི་འོད་ཟེར་གྱི་ལེའུ་དང་། སེམས་ཅན་རྣམས་ཀྱི་ལས་ཟད་པར་འགྱུར་བའི་གཟུངས་སྔགས་འདི་ལ་དད་པ་སྩོལ་བར་མཛད་ཅིང་ཞེས་བྱ་བའི་བར་དང་། དེ་ནས་ཀྱང་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་མཐུ་སྟོབས་ཆེ་བ། ཕན་ཡོན་ཆེ་བ། འདོད་པའི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ། གཟུགས་ཀྱི་འདོད་ཆགས་ཐམས་ཅད་ཀུན་ཏུ་ཟད་པར་བྱེད་པ་ཞེས་བྱ་བ་ནས། སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པ་འདི་བསྐུར་ལགས་སོ་ཞེས་བྱ་བའི་བར་སྔ་མ་བཞིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་སྟོང་པ་ཉིད་དང་རྗེས་སུ་འཐུན་པའི་གཟུངས་སྔགས་ཀྱི་ཡོན་ཏན་གྱི་ཕན་ཡོན་དང་། སྟོང་པ་ཉིད་ཀྱི་ཕན་ཡོན་བདག་གིས་བཟུང་ལགས་ན་བཙུན་པ་བཅོམ་ལྡན་འདས་སངས་རྒྱས་ཀྱི་ཞིང་མི་མཇེད་དེར་མཆི་བ་ལ་བདག་འཇིགས་ལགས་སོ། །བཙུན་པ་བཅོམ་ལྡན་འདས་དེ་ཅིའི་སླད་དུ་ཞེ་ན། ད་ལྟར་བཅོམ་ལྡན་འདས་ལས་བདག་གིས་མངོན་དུ་ཐོས་ཤིང་མངོན་དུ་བཟུང་ལགས་ཏེ། འདི་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་རྣམས་མཆོག་ཏུ་འདོད་ཆགས་ཀྱི་ཤས་ཆེ་བ་ཞེས་བགྱི་བ་ནས། བུད་མེད་ཀྱི་ཉེས་པས་དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ་དག་དང་། ངན་སོང་བ་དག་དང་། སེམས་ཅན་དམྱལ་བ་པའི་བར་འབྱུང་ཞིང་འབྱུང་བར་འགྱུར་བའི་བར་གྱི་སླད་དུའོ། །དེ་ནས་དེ་བཞིན་གཤེགས་པ་རི་དབང་རྒྱལ་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཆེ་ལ་འདི་སྐད་ཅེས་བཀའ་སྩལ་ཏོ།