༄༅༅། །རྒྱ་གར་སྐད་དུ། ཨཱརྱ་སཱུརྱ་གརྦྷ་ནཱ་མ་མ་ཧཱ་བཻ་བུ་ལྱཾ་སཱུ་ཏྲ། བོད་སྐད་དུ། འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་ཏེ། གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་གྲངས་མེད་དཔག་ཏུ་མེད་པ་དག་ནས་དེར་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད། དཔག་ཏུ་མེད། བརྗོད་དུ་མེད་པ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་སོ། །དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་གཞན་དང་གཞན་དག་ནས་དེར་འདུས་ཏེ་ལྷགས་པའི་ཉན་ཐོས་ཆེན་པོ་གྲངས་མེད། དཔག་ཏུ་མེད། བརྗོད་དུ་མེད་པ་དག་གིས་ཀྱང་ཡོངས་སུ་བསྐོར་ཅིང་མདུན་གྱིས་བལྟས་སོ། །དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་གཞན་དང་གཞན་དག་ནས་འདིར་ལྷགས་པ་བརྒྱ་བྱིན་དང་། ཚངས་པའི་དབང་པོ་དང་། ལྷའི་དབང་པོ་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། དྲི་ཟའི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་། ལྟོ་འཕྱེ་ཆེན་པོའི་དབང་པོ་གྲངས་མེད། དཔག་ཏུ་མེད། བརྗོད་དུ་མེད་པ་དག་གིས་ཀྱང་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་ས་དང་ནམ་མཁའ་ལ་འགྲོ་བའི་ལམ་གང་བར་གྱུར་ཏོ། །དེ་བཞིན་དུ་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་གཞན་དང་གཞན་དག་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་གཞན་དང་། གཞན་གྲངས་མེད་དཔག་ཏུ་མེད་པ་དག་ཀྱང་ལྷགས་ནས། བཅོམ་ལྡན་འདས་ལ་གྱེན་དུ་ལྟ་ཞིང་། བཅོམ་ལྡན་འདས་རིང་པོ་མི་ཐོགས་པར་མཐར་ཕྱིན་པ། ནམ་མཁའ་ལྟར་སྣང་བ། བྱང་ཆུབ་སེམས་དཔའི་སྤྱོད་པ་རབ་ཏུ་འབྱེད་པ། དབུགས་རྔུབ་པ་དང་། འབྱུང་བ་དྲན་པ་འཆི་བ་མེད་པའི་སྒོ། ཚངས་པའི་གནས་པ་ལུང་བསྟན་པ་སྟོན་པ་ན་ཅང་མི་སྨྲ་བར་འཁོད་དེ་ཐམས་ཅད་དང་ལྡན་པའི་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་ས་དང་ནམ་མཁའི་ལམ་གང་བར་གྱུར་ཅིང་།