བཙུན་པ་བཅོམ་ལྡན་འདས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་བདག་ཆས་པའི་དུས་ཀྱི་ཚེ་བསྲུང་བའི་སླད་དུ་གང་སྡང་བ་ཞི་བར་བགྱིད་པའི་གཟུངས་སྔགས་སྩལ་བ་ནི་འདི་ལགས་སོ། །དེ་ནས་དེ་བཞིན་གཤེགས་པ་ཤཱཀྱ་ཐུབ་པས་ཚེ་དང་ལྡན་པ་མཽད་གལ་གྱི་བུ་ལ་བཀའ་སྩལ་པ། མཽད་གལ་གྱི་བུ་ཁྱོད་ཀྱིས་སྡང་བ་ཞི་བར་བྱེད་པ་གཉིད་ཀྱིས་ལོག་པར་བྱེད་པའི་གཟུངས་སྔགས་དམིགས་པ་མེད་པའི་ཚངས་པའི་གནས་པའི་རྒྱུ་འཐུན་པ་འདི་ཟུང་ཤིག །མཽད་གལ་གྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། །དེ་བས་ཀྱང་སྡང་བ་ཞི་བར་བྱེད་པ་གཉིད་ཀྱིས་ལོག་པར་བྱེད་པའི་གཟུངས་སྔགས་དམིགས་པ་མེད་པའི་ཚངས་པའི་གནས་པའི་རྒྱུ་འཐུན་པ་འདི་ཆེས་རྙེད་པར་དཀའོ། །མཽད་གལ་གྱི་བུ་སྡང་བ་ཞི་བར་བྱེད་པ་གཉིད་ཀྱིས་ལོག་པར་བྱེད་པ་འདི་ནི་བསྐལ་པ་བརྒྱ་སྟོང་དུ་ལས་གཞན་མི་བྱེད་པར་བསྟན་ཀྱང་ལྷ་དང་བཅས་པའི་འཇིག་རྟེན་དང་། ཐ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ས་ལ་གནས་པ་རྣམས་ཀྱིས་ཀྱང་རུང་གང་གིས་ཀྱང་དོན་གཟུང་བར་མི་ནུས་སོ། །དེ་བཞིན་གཤེགས་པ་ཉིད་ནི་མ་གཏོགས་ཏེ། དེ་ལྟར་ཟབ་ཅིང་དེ་ལྟར་དོན་ཆེ་བ་ཡིན་ལ་དེ་ལྟར་ཕན་ཡོན་ཆེ་བ་ཡིན་ནོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་དང་། བསམ་པ་ཡོངས་སུ་རྫོགས་པར་བྱེད་པ་ཡིན་ཞིང་སེམས་ཅན་ཡོངས་སུ་སྨིན་པར་བྱེད་པའི་སྙིང་རྗེ་ཆེན་པོ་ཡང་ཐོབ་པར་བྱེད་པའོ། །མཽད་གལ་གྱི་བུ་དེ་ལྟ་བས་ན་སྡང་བ་ཞི་བར་བྱེད་པ་གཉིད་ཀྱིས་ལོག་པར་བྱེད་པའི་གཟུངས་སྔགས་འདི་ཟུང་ཤིག །དུས་དུས་སུ་སེམས་ཅན་རྣམས་ལ་རྒྱ་ཆེར་ཡང་དག་པར་རབ་ཏུ་སྟོན་ཅིག །སེམས་ཅན་གང་དག་ཉན་པར་བྱེད་པ་དེ་དག་ཀྱང་ཐོས་པ་ཙམ་གྱིས་ཡོན་ཏན་དང་ཕན་ཡོན་མང་པོ་ཐོབ་པར་འགྱུར་རོ། །ཁྲོ་བ་མང་པོ་མི་འདོད་པ་མྱོང་བར་འགྱུར་བ་ལས་ཀྱི་རྣམ་པར་སྨིན་པའི་འབྲས་བུ་རྣམས་མེད་པར་འགྱུར་རོ། །མི་སྣང་བར་འགྱུར་རོ། །འཁོར་བའི་སྐྱོན་མང་པོ་རྣམ་པར་ཤེས་པར་འགྱུར་རོ།