།འཁོར་བའི་སྐྱོན་མང་པོ་རྣམ་པར་ཤེས་པར་འགྱུར་རོ། །དགེ་བའི་རྩ་བ་མང་པོ་སྐྱེད་པར་འགྱུར་རོ། །བསོད་ནམས་མང་པོ་སོ་སོར་འཛིན་པར་བྱེད་དོ། །དགེ་བའི་བཤེས་གཉེན་མང་པོ་ལ་སྟེན་པར་བྱེད་དོ། །སྙེན་པར་བྱེད་དོ། །བསྙེན་བཀུར་བྱེད་དོ། །དེས་ན་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །མཽད་གལ་གྱི་བུ་གཟུངས་སྔགས་འདི་ནི་ཆོས་ཀྱི་མར་མེ་འབར་བར་བྱེད་པ། དཀོན་མཆོག་གསུམ་གྱི་གདུང་མི་ཆད་པར་བྱེད་པ་ཡིན་ནོ། །འདུས་པ་ཆེན་པོ་ཐེག་པ་ཆེན་པོའི་མདོ་ཉི་མའི་སྙིང་པོའི་ལེའུ་ལས། གཟུངས་སྔགས་ཀྱི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་ཀྱིས་ཕོ་ཉ་བཞི་པོ་དེ་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ལ་ཡང་བཀའ་སྩལ་པ། རིགས་ཀྱི་བུ་དག་སངས་རྒྱས་ཀྱི་ཞིང་འདིར་རང་རང་གི་དགེ་བའི་ཕྱོགས་ཀྱིས་གནས་པར་བྱོས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འཁོར་དང་བཅས་ཏེ། གནས་ཇི་ལྟ་བ་བཞིན་དུ་སྐྱིལ་མོ་ཀྲུང་གིས་འཁོད་ནས་ཇི་ལྟར་འཚམ་པ་བཞིན་དུ་བཟོད་པའི་གཟུངས་ལ་སྙོམས་པར་འཇུག་པ་ཤིན་ཏུ་བསྒོམས་པ་དག་གིས་སྙོམས་པར་ཞུགས་སོ། །སྙོམས་པར་ཞུགས་པ་དེ་དག་ཁ་ཅིག་གི་ལུས་ལས་འོད་འདི་ལྟ་བུ་བྱུང་སྟེ། དཔེར་ན་འབྲུ་མར་གྱི་མར་མེ་བཞིན་ནོ། །ཁ་ཅིག་གི་ནི་དཔེར་ན་ཟླ་བ་དང་ཉི་མ་བྱེ་བ་བརྒྱ་སྟོང་གི་འོད་བཞིན་པའི་བར་དུའོ། །ཡང་དེའི་ཚེ་ཚེ་དང་ལྡན་པ་ཀུན་ཤེས་ཀཽ་ཌི་ནྱས་འདི་སྙམ་དུ་སེམས་ཏེ། སངས་རྒྱས་ཀྱི་མཐུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་གིས་ཞུ་བ་ཇི་ལྟ་བུས་དེ་བཞིན་གཤེགས་པ་གཟུངས་སྔགས་བཞི་པོ་ཐམས་ཅད་རྒྱ་ཆེར་ཡང་དག་པར་རབ་ཏུ་སྟོན་པར་མཛད་པ་དང་། སངས་རྒྱས་ཀྱི་ཞིང་མི་མཇེད་དུ་ཇི་ལྟར་ལྷགས་པའི་སེམས་ཅན་རྣམས་ཉན་པར་བྱེད་པ་དང་། ཐེ་ཙོམ་ཐམས་ཅད་སྤོང་བར་འགྱུར་བ་དང་། ཆོས་ཐམས་ཅད་ལ་སྣང་བ་ཐོབ་པ་དང་། ལྟད་མོ་དང་བྲལ་བ་དང་། སོམ་ཉི་ལས་རྒལ་ཅིང་ཐེ་ཙོམ་ལས་རྒལ་བར་འགྱུར་བ་དང་། མྱུར་དུ་སྐྱོན་མེད་པར་འཇུག་པ་དང་།