གཉིད་ཀྱིས་ལོག་པར་བྱེད་པའི་བསྟན་པ་འདི་བཤད་པ་ན་སྡང་བའི་སྦྲུལ་ཐམས་ཅད་རང་གི་གནས་སུ་དོང་ནས་གཉིད་ཀྱིས་ལོག་པར་གྱུར་ཏེ། གང་དག་བཟོད་པ་ཐོབ་པ་རྣམས་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་རྣམས་ནི་མ་གཏོགས་སོ། །སྲིད་པ་ན་གང་དག་སྡང་བའི་གནོད་སྦྱིན་རྣམས་དང་། གང་དག་སྡང་བའི་ལྷ་མ་ཡིན་རྣམས་དང་ཞེས་བྱ་བ་ནས་སྡང་བའི་ནམ་མཁའ་ལྡིང་རྣམས་ཞེས་བྱ་བའི་བར་དང་། སྡང་བའི་མི་འམ་ཅི་རྣམས་ཞེས་བྱ་བའི་བར་དང་། ཡི་དགས་རྣམས་ཞེས་བྱ་བའི་བར་དང་། ཤ་ཟ་རྣམས་ཞེས་བྱ་བའི་བར་དང་། སྲུལ་པོ་རྣམས་ཞེས་བྱ་བའི་བར་དང་། གང་དག་སྡང་བའི་ལུས་སྲུལ་པོ་རྣམས་ཞེས་བྱ་བའི་བར་དེ་དག་རང་རང་གི་གནས་སུ་དོང་ནས་གཉིད་ཀྱིས་ལོག་པར་གྱུར་ཏེ། བྱང་ཆུབ་སེམས་དཔའ་བཟོད་པ་ཐོབ་པ་རྣམས་དང་། ཕྱིར་མི་ལྡོག་པ་རྣམས་ནི་མ་གཏོགས་སོ། །གང་དག་སྡང་བའི་མི་གཟུ་ལུམས་ཅན་དང་། རྩུབ་པ་དང་། སྙིང་བརྩེ་བ་མེད་པ་དང་། ཕན་ཚུན་མི་འཐུན་པ་དང་། རྟག་ཏུ་ཁྲོ་བ་སྤྱོད་པ་དང་། འཇིག་རྟེན་ཕ་རོལ་གྱིས་འཇིགས་པར་མི་ལྟ་བ་དང་། མཚམས་མེད་པ་བྱེད་པ་དང་། དམ་པའི་ཆོས་སྤོང་བར་བྱེད་པ་དང་། འཕགས་པ་ལ་སྐུར་པ་འདེབས་པ་དང་། མི་དགེ་བའི་རྩ་བ་དང་ལྡན་པ་དེ་དག་ཀྱང་སྡང་བ་ཞི་བར་བྱེད་པ། གཉིད་ཀྱིས་ལོག་པར་བྱེད་པའི་བསྟན་པ་འདི་ཐོས་པས་ཐམས་ཅད་མཆོག་ཏུ་བྱམས་པའི་སེམས་དང་ལྡན་པ་དག་དང་། སྙིང་རྗེའི་སེམས་དང་ལྡན་པ་དག་དང་། སྙིང་བརྩེ་བའི་སེམས་དང་ལྡན་པ་དག་དང་། འཁོན་མེད་པའི་སེམས་དང་ལྡན་པ་དག་དང་། མི་འཁྲུགས་པའི་སེམས་དང་ལྡན་པ་དག་དང་། ཆོས་ལ་དམིགས་པའི་སེམས་དང་ལྡན་པ་དག་དང་། འཇིག་རྟེན་ཕ་རོལ་གྱིས་འཇིགས་པའི་སེམས་དང་ལྡན་པ་དག་དང་། དཀོན་མཆོག་གསུམ་ལ་ལྷག་པར་གུས་པའི་སེམས་དང་ལྡན་པ་དག་དང་། ཆོས་ལ་དམིགས་པའི་སེམས་དང་ལྡན་པ་དག་དང་། ཞི་བའི་སེམས་དང་ལྡན་པ་དག་ཏུ་གནས་པར་གྱུར་ཏོ། །གསོལ་པ། བཙུན་པ་བཅོམ་ལྡན་འདས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་བདག་ཆས་པའི་དུས་ཀྱི་ཚེ་བསྲུང་བའི་སླད་དུ་གང་སྡང་བ་ཞི་བར་བགྱིད་པའི་གཟུངས་སྔགས་སྩལ་བ་ནི་འདི་ལགས་སོ།