།ཚངས་པའི་འཇིག་རྟེན་གྱི་ཚེའི་མཐས་གཏུགས་པ་སྲིད་ཀྱི་བསམ་གཏན་གྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་ཕན་མི་འདོགས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །མ་བསྒྲགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་དཔེར་ན་དེ་བཞིན་གཤེགས་པས་གསུངས་ཤིང་བཤད་པ་ན་ཆོས་དེ་སྙེད་ཅིག་བསྒྲགས་ཤིང་བཤད་ལ་ཆོས་ཇི་སྙེད་ལུས་ལ་དེ་སྙེད་ཅིག་མ་བསྒྲགས་པ་དེ་ནི་ཕན་མི་འདོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། དེ་དག་ཐམས་ཅད་ཀྱང་ཡོངས་སུ་མྱ་ངན་ལས་འདས་པའི་དམ་པའི་ཆོས་ནུབ་པར་བལྟ་བར་བྱ་སྟེ། འདི་དག་ནི་ཕན་མི་འདོགས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་ལྷག་མ་དང་བཅས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྔོན་མར་མེ་མཛད་ལ་བྱང་ཆུབ་སེམས་དཔའས་སྦྱིན་པ་ཕུལ་བ་གང་ཡིན་པ་དེ་ནི་ལྷག་མ་དང་བཅས་པའི་སྦྱིན་པའི་ཕ་རོལ་ཏུ་ཕྱིན་པའོ། །ལུས་དང་ངག་ལྷག་མ་དང་བཅས་ཤིང་མི་མོས་པ་མང་ལ་བདག་ཏུ་དམིགས་པ་ལ་གནས་པའི་ཚུལ་ཁྲིམས་གང་ཡིན་པ་དེ་ནི་ལྷག་མ་དང་བཅས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །སོ་སོར་བརྟགས་པའི་སྟོབས་ཀྱིས་ངེས་པར་འབྱུང་བའི་བཟོད་པ་གང་ཡིན་པ་དེ་ནི་ལྷག་མ་དང་བཅས་པའི་བཟོད་པའི་ཕ་རོལ་ཏུ་ཕྱིན་པའོ། །བར་ཆད་དང་བར་ཆད་མེད་པར་གནས་པའི་བརྩོན་འགྲུས་གང་ཡིན་པ་དེ་ནི་ལྷག་མ་དང་བཅས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དམིགས་པ་ལ་དམིགས་པའི་བསམ་གཏན་གང་ཡིན་པ་དེ་ནི་ལྷག་མ་དང་བཅས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །ཐོས་པའི་བདག་ཉིད་དང་། བསམ་པའི་བདག་ཉིད་ཀྱི་ཤེས་རབ་གང་ཡིན་པ་དེ་ནི་ལྷག་མ་དང་བཅས་པའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །རྒྱུ་གང་གིས་ན་གནས་ཀྱི་ཕ་རོལ་ཏུ་ཕྱིན་པའི་མིང་ཐོབ་ཅེ་ན། ཁ་ཕྱིར་ཕྱོགས་པ་ལ་ཉན་ཐོས་དང་། རང་སངས་རྒྱས་ཀྱི་ཆོས་ཀྱི་རྣམ་པར་སྨིན་པ་མེད་ལ་བྱང་ཆུབ་ཀྱི་འབྱོར་པ་ཡང་མེད་དེ། དེ་དག་ནི་ས་བཅུ་ལས་ལྡོག་པའི་ཆོས་སུ་ཤེས་པར་བྱ་སྟེ། འདི་དག་ནི་བྱང་ཆུབ་སེམས་དཔའི་ལྷག་མ་དང་བཅས་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་བྱང་ཆུབ་སེམས་དཔའི་ལྷག་མ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན།