Degé Kangyur volume 45, F.1.b

༄༅༅། །​རྒྱ་གར་སྐད་དུ། ཨཱརྱ་བྷ་དྲ་ཀལྤི་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །​འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་བཞུགས་ཏེ། དབྱར་གནས་པར་བཞུགས་བཞུགས་ནས། དབྱར་ཟླ་གསུམ་འདས་པ་དང་། ཆོས་གོས་མཛད་དོ། །​ཆོས་གོས་མཛད་ནས། ཆོས་གོས་མནབས་ཏེ། ལྷུང་བཟེད་ཐོགས་ནས། ཡངས་པ་ཅན་གྱི་གྲོང་ཁྱེར་ག་ལ་བ་དེར། དགེ་སློང་འབུམ་དང་ཡང་ཐབས་ཅིག །​བྱང་ཆུབ་སེམས་དཔའ་བྱེ་བ་ཕྲག་བརྒྱད་ཅུ་སྙེད་དང་ཡང་ཐབས་ཅིག་ཏུ་གཤེགས་ཏེ། བྱོན་ནས་ཚལ་ཆེན་པོར་གཤེགས་པ་དང་། ནང་དུ་ཡང་དག་འཇོག་ལས་བཞེངས་སོ། །​བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོ་དེ་ཡང་ནང་དུ་ཡང་དག་འཇོག་ལ་ཞུགས་པ་ལས། ནང་དུ་ཡང་དག་འཇོག་ལས་ལངས་ཏེ།



The English translation of this folio by 84000 - Translating the words of the Buddha can be found at:
https://read.84000.co/translation/toh94.html?part=UT22084-045-001-13856#UT22084-045-001-13856