བྱང་ཆུབ་སེམས་དཔའ་ལ་སངས་རྒྱས་ཀྱིས་ལེན་པ་མེད་པར་བསྒྲགས་པའི་བསམ་གཏན་ནི་དཔེར་ན་བྱང་ཆུབ་སེམས་དཔའ་སྟོན་པར་གྱུར་པས་བྱང་ཆུབ་སེམས་དཔའ་རྣམས་ཚངས་པའི་འཇིག་རྟེན་དང་། འོད་གསལ་ནས་འདུ་ཤེས་མེད་པའི་སྐྱེ་མཆེད་ཀྱི་བར་དུ་བཀོད་པ་གང་ཡིན་པ་དེ་ནི་ཕན་འདོགས་པས་ཡོངས་སུ་བསྔོས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །སེམས་ཅན་རྣམས་ཀྱི་ཆེད་དུ་བྱས་པ་ནི་དཔེར་ན་རྒྱལ་པོ་བྱམས་ཐོབ་དང་། རྒྱལ་པོ་མིག་བཟངས་དང་། རྒྱལ་པོའི་བུ་ཆོས་འདོད་ཀྱིས་འཇིག་རྟེན་པ་དང་། འཇིག་རྟེན་ལས་འདས་པའི་ཆོས་རྣམས་དང་། དགེ་བ་བཅུའི་ལས་ཀྱི་ལམ་རྣམས་རབ་ཏུ་སྒྲོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདིར་སྐྱེས་པའི་རབས་མང་པོ་ནས་ཁོང་དུ་ཆུད་པར་བྱ་བ་གང་ཡིན་པ་དེ་ནི་ཕན་འདོགས་པས་ཡོངས་སུ་བསྔོས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་ཕན་འདོགས་པའི་ཕ་རོལ་ཏུ་ཕྱིན་པ་དྲུག་གོ། །།འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ལྔ་པ། དེ་ལ་ཕན་མི་འདོགས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཡིད་སྔོན་དུ་འགྲོ་བའི་སེམས་ཀྱིས་འདོད་པའི་ཡོན་ཏན་ལ་འཇུག་པའི་སྦྱིན་པ་དམིགས་པ་དང་བཅས་པར་ཡོངས་སུ་བསྔོས་པ་གང་ཡིན་པ་དེ་ནི་ཕན་མི་འདོགས་པའི་སྦྱིན་པའི་ཕ་རོལ་ཏུ་ཕྱིན་པ་སྟེ། དཔེར་ན་མར་མེ་མཛད་ལ་མེ་ཏོག་ཨུད་པ་ལ་ལྔ་ཕུལ་བ་དང་། རྣམ་པར་སྨིན་པ་ཐམས་ཅད་དུ་མི་འབྱུང་བ་དང་། གང་དམ་པའི་ཆོས་ནུབ་པར་འགྱུར་བ་དེ་ནི་ཕན་མི་འདོགས་པའི་སྦྱིན་པའི་ཕ་རོལ་ཏུ་ཕྱིན་པའོ། །ཐབས་མཁས་པ་མེད་ཅིང་དངོས་པོའི་འདུ་ཤེས་ཅན་གྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་ཕན་མི་འདོགས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །རོ་མྱང་བ་ཅུང་ཟད་ཙམ་གྱི་ཕྱིར། སྡུག་བསྔལ་ལ་ཇི་མི་སྙམ་པའི་བཟོད་པའི་ཕ་རོལ་ཏུ་ཕྱིན་པ་གང་ཡིན་པ་དེ་ནི་ཕན་མི་འདོགས་པའི་བཟོད་པའི་ཕ་རོལ་ཏུ་ཕྱིན་པའོ། །འཇིག་རྟེན་པའི་ཆོས་དང་རབ་ཏུ་ལྡན་པའི་བརྩོན་འགྲུས་གང་ཡིན་པ་དེ་ནི་ཕན་མི་འདོགས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །ཚངས་པའི་འཇིག་རྟེན་གྱི་ཚེའི་མཐས་གཏུགས་པ་སྲིད་ཀྱི་བསམ་གཏན་གྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་ཕན་མི་འདོགས་པའི་བསམ་གཏན་གྱི་ཕ་རོལ་ཏུ་ཕྱིན་པའོ།