བདེ་གཤེགས་ཤེས་རབ་ཆེ་སྟེགས་ནད་པའི་ཚེ། །དེ་བཞིན་གཤེགས་པ་རྣམ་གྲངས་དབྱངས་དེ་ལ། །པི་པི་ལིང་གི་འབྲས་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བློ་གྲོས་ཟླ་མེད་ཚོང་པའི་ཚེ། །དེ་བཞིན་གཤེགས་པ་དབྱངས་ནི་ཆེན་པོ་དེ། །ཉི་མ་འགའ་ཞིག་བཞུགས་པར་གསོལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྡོ་རྗེ་མཁྲེགས་ནི་བྱིས་པའི་ཚེ། །དེ་བཞིན་གཤེགས་པ་རྣམ་པར་འབྱེད་ལྡན་ལ། །ཏིལ་དང་འདྲེས་པའི་འབྲས་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བྱང་ཆུབ་བློ་གྲོས་རྫ་མཁན་ཚེ། །དེ་བཞིན་གཤེགས་པ་དགོངས་པ་ཆེན་པོ་ལ། །མེ་ཏོག་བར་ཤི་ཀ་དག་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལྗོན་ཤིང་དབང་པོ་རྒྱལ་པོ་ཡི། །ཕོ་ཉའི་ཚེ་ན་བདེ་གཤེགས་གཟུགས་གསལ་ལ། །སྐུ་རེགས་གཅིག་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གདངས་སྙན་འདྲོན་པོའི་ཚེ། །དེ་བཞིན་གཤེགས་པ་མཐུ་རྩལ་ཆེན་པོ་དེ། །འཇིགས་པ་མེད་པས་ལམ་ཀར་སྤྱན་དྲངས་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བསོད་ནམས་སྟོབས་ནི་ཚོང་དཔོན་ཚེ། །དེ་བཞིན་གཤེགས་པ་བདེ་བར་གཟིགས་དེ་ལ། །ཞུན་མར་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མཐུ་དཔལ་དགེ་སློང་ཚེ། །བཟོད་པ་དག་ནི་བསྒོམ་པ་བྱས་ནས་ཀྱང་། །དེ་བཞིན་གཤེགས་པ་གནོད་པ་སྤངས་པ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཕགས་དགྱེས་དགོན་པའི་དགེ་སློང་ཚེ། །དེ་བཞིན་གཤེགས་པ་ཞི་བ་གསལ་དེ་ལ། །སྲན་གྱི་ཕྱེད་ཙམ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མཐུ་སྟོབས་ཕྲེང་རྒྱུད་ཚེ། །དེ་བཞིན་གཤེགས་པ་རིམས་མེད་བློ་ལྡན་ལ། །འབྲས་བུ་སར་པ་མཆོག་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐར་དགྱེས་བཅའ་བ་མཁན་གྱི་ཚེ།