།བདེ་གཤེགས་སྐར་དགྱེས་བཅའ་བ་མཁན་གྱི་ཚེ། །དེ་བཞིན་གཤེགས་པ་དགྲ་བཅོམ་སྟེགས་དེ་ལ། །སྣོད་དག་སྦྲང་རྩིས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤྲིན་གྱི་རྔ་སྒྲ་སྤོས་འཚོང་ཚེ། །དེ་བཞིན་གཤེགས་པ་བློ་ལྡན་ལེགས་བསགས་ལ། །ཨུ་ཤི་ར་ཡི་ཕྱེ་མ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྤྱན་དག་སྡུག་པའི་ཞལ། །ཕྱག་དར་པ་ཚེ་རྔ་ཆེན་བརྡུངས་ནས་ཀྱང་། །དེ་བཞིན་གཤེགས་པ་ཀུན་དུ་གསལ་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡེ་ཤེས་བཟང་ལྡན་ཤིང་དཔོན་ཚེ། །དེ་བཞིན་གཤེགས་པ་ཟླ་བའི་གཟི་བརྗིད་ལ། །སྣོད་དག་འོ་མས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་འབྱོར་ལྡན་རྟེན་བཅས་ཚེ། །དེ་བཞིན་གཤེགས་པ་ལྷ་ཡི་མཆོད་གནས་ལ། །ལ་དུ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་ཕུང་པོ་ཀུན་རྒྱུའི་ཚེ། །དེ་བཞིན་གཤེགས་པ་ལྷ་ཡི་དབྱངས་དེ་ལ། །ཀྲྀཥྞ་ས་རའི་པགས་པ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གསལ་བ་རྒྱལ་པོའི་བུ་མོའི་ཚེ། །དེ་བཞིན་གཤེགས་པ་མེ་ཏོག་ཉི་མ་ལ། །གསེར་གྱི་ཕྲེང་བ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཆོས་ཀྱི་རྒྱལ་མཚན་སློང་བའི་ཚེ། །དེ་བཞིན་གཤེགས་པ་ལེགས་གནས་ཞབས་དེ་ལ། །གོས་ཀྱི་རས་མ་སོར་བཞི་ཙམ་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡེ་ཤེས་ང་རོ་ཚོང་དཔོན་གྱི། །བུ་ཚེ་དེ་བཞིན་གཤེགས་པ་ཏོག་དེ་ལ། །ཚེམས་ཤིང་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ནམ་མཁའ་ཤིང་ཐུན་ཚེ། །བདེ་གཤེགས་སྣ་མའི་མེ་ཏོག་གསལ་དེ་ལ། །རྒྱ་ཤུག་དག་གི་འབྲས་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཆོད་སྦྱིན་ང་རོ་རྟེན་བཅས་ཚེ། །དེ་བཞིན་གཤེགས་པ་སྟོབས་ཀྱི་འོད་དེ་ལ། །བལ་སྲན་གྲེའུ་དང་སྦྱར་བའི་འབྲུ་མར་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ།