།དེ་བཞིན་གཤེགས་པ་རྣམ་དག་འོད་དེ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་གྲགས་པ་ཚོང་པའི་ཚེ། །དེ་བཞིན་གཤེགས་པ་སྟོན་ཀའི་ཉི་མ་ལ། །ནོར་བུ་བཻ་དཱུརྱ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་ཟེར་དྲ་བ་ལོ་མའི་ཁུར་ཁྱེར་ཚེ། །དེ་བཞིན་གཤེགས་པ་སྣང་བ་བལྟ་ན་སྡུག་དེ་ལ། །ཧི་མིན་ཛ་ལའི་མེ་ཏོག་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བཻ་དཱུརྱ་སྙིང་ཤིང་སྲུངས་ཚེ། །དེ་བཞིན་གཤེགས་པ་བརྟན་པའི་བློ་དེ་ལ། །ཨ་མྲ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མེ་ཏོག་ཤིང་སྲུངས་ཚེ། །དེ་བཞིན་གཤེགས་པ་ལྗོན་པའི་མེ་ཏོག་ལ། །ཏང་གའི་མེ་ཏོག་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལྷ་ཡི་རྒྱལ་པོ་དེད་དཔོན་ཚེ། །དེ་བཞིན་གཤེགས་པ་འབར་བའི་དབྱངས་དེ་ལ། །སྐྱེད་མོས་ཚལ་ནི་བཅུ་སྙེད་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཟླ་བ་མགར་བའི་ཚེ། །དེ་བཞིན་གཤེགས་པ་བདུད་རྩིའི་གོ་ཆ་ལ། །རིལ་བ་སྤྱི་ལུགས་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དྲན་འོད་ལྕགས་མགར་ཚེ། །དེ་བཞིན་གཤེགས་པ་སེང་གེའི་སྒྲ་དེ་ལ། །སྣར་བླུགས་པ་ཡི་སྤྱད་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དགེ་འོད་དགེ་སློང་ཚེ། །དེ་བཞིན་གཤེགས་པ་དགེ་བའི་ལྷ་དེ་ལ། །ནོར་བུའི་སྒྲོན་མ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་མཆོག་མ་ཀུན་གྱི་འོད། །ཚོང་པའི་ཚེ་ན་བདེ་གཤེགས་དབྱངས་མཆོག་ལ། །ཤིང་ན་ག་ཡི་མེ་ཏོག་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རིན་པོ་ཆེ་ཡི་དཔལ། །ཕྱག་དར་པ་ཚེ་བདེ་གཤེགས་དཔལ་དགྱེས་ལ། །གཙུག་ལག་ཁང་དང་ཕྲེང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྐྱེས་བུ་ཟླ་བ་བྲམ་ཟེའི་ཚེ། །གཅོང་རོང་དག་ཏུ་ཟམ་པ་བྱས་ནས་ཀྱང་།