།བདེ་གཤེགས་བདེན་པའི་ཕུང་པོ་ཆང་འཚོང་ཚེ། །དེ་བཞིན་གཤེགས་པ་རི་དབང་མཚུངས་དེ་ལ། །རྫ་རྔ་དང་ནི་ལོ་མ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དབྱངས་སྙན་རྩྭ་འཚོང་ཚེ། །དེ་བཞིན་གཤེགས་པ་སྟབས་ཆེན་དེ་ལ་ནི། །རྩྭ་སྤྱིལ་དག་ནི་བྱས་ཏེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རི་དབང་མཚུངས་ནི་རྒྱལ་བུའི་ཚེ། །དེ་བཞིན་གཤེགས་པ་ཡིད་དུ་འོང་བའི་དབྱངས། །དེ་ལ་གདུགས་དག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཆོས་བརྩེགས་ལྷ་ཡི་བསྙེན་བཀུར་བ། །བྱེད་ཚེ་བདེ་གཤེགས་བསོད་ནམས་བརྩེགས་པ་ལ། །མེ་ཏོག་ཆང་པ་གང་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཐར་པའི་གཟི་བརྗིད་རྒྱལ་བུའི་ཚེ། །དེ་བཞིན་གཤེགས་པ་ནོར་བུ་ཟླ་བ་ལ། །ཙུག་ཀྲ་རུ་ཀའི་འབྲས་བུ་བརྒྱད་ཕུལ་ནས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ལེགས་མཛད་གར་མཁན་བུ་མོའི་ཚེ། །དེ་བཞིན་གཤེགས་པ་སྤྱན་སྡུག་དེ་ལ་ནི། །རས་བལ་དག་གི་ཕྲེང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རབ་ཞི་སྐུ་ནི་འཕྲེང་རྒྱུད་ཚེ། །དེ་བཞིན་གཤེགས་པ་སྙན་པར་གྲགས་དེ་ལ། །ཙམ་པ་ཀ་ཡི་ཕྲེང་བ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡིད་འོང་གསུང་ནི་དམག་མིའི་ཚེ། །དེ་བཞིན་གཤེགས་པ་གསལ་བའི་དཔལ་དེ་ལ། །རས་ཡུག་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་བློ་སྦྱངས་སྨན་པའི་ཚེ། །བདེ་གཤེགས་སེང་གེའི་མཆེ་བ་དགོངས་མལ་དུ། །འབྲུ་མར་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཆུ་ལྷ་གདུགས་མཁན་ཚེ། །དེ་བཞིན་གཤེགས་པ་རིན་ཆེན་མཆོད་འོས་ལ། །དུས་སུ་བསིལ་ཡབ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་གེའི་ལོགས་ནི་དེད་དཔོན་ཚེ། །དེ་བཞིན་གཤེགས་པ་དྲི་ཞིམ་འོད་དེ་ལ། །སྟོན་མོ་ཆེན་མོ་དག་ནི་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །