Degé Kangyur volume 45, F.312.a

།སྤོས་ཀྱི་ཟ་མ་ཏོག་ནི་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཆོས་ཀྱི་ཡོན་ཏན་ཕྱྭ་མཁན་ཚེ། །​དེ་བཞིན་གཤེགས་པ་ཚུལ་ཁྲིམས་དགྱེས་དེ་ལ། །​ཁང་པ་དག་ནི་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཞིང་བཟང་ལྷ་ཡི་བརྟུལ་ཞུགས་ཚེ། །​དེ་བཞིན་གཤེགས་པ་འཇིག་རྟེན་གསལ་དེ་ལ། །​གུ་གུལ་བདུག་པ་དག་གིས་བདུགས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་བཀོད་པའི་རྒྱལ་པོ་འཁོར་སྒྱུར་ཚེ། །​དེ་བཞིན་གཤེགས་པ་ཟླ་བའི་འོད་དེ་ལ། །​བཻ་དཱུརྱ་ཡི་ཁང་བཟངས་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་མངོན་འཕགས་ལྷ་ལ་དད་པའི་ཚེ། །​དེ་བཞིན་གཤེགས་པ་སེང་གེ་རྣམ་བསྒྱིངས་ལ། །​མེ་ཏོག་དག་ལས་བྱས་པའི་གདུགས་ཕུལ་ནས། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྦྱིན་སྲེག་འོད་འཕྲོ་དེད་དཔོན་ཚེ། །​དེ་བཞིན་གཤེགས་པ་བློ་གྲོས་རྙོག་མེད་ལ། །​བཀད་ས་དག་ནི་བྱས་ཏེ་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་པད་དཔལ་ཕྱུག་པོའི་བུར་གྱུར་ཚེ། །​དེ་བཞིན་གཤེགས་པ་གྲགས་པ་གསལ་བ་པོ། །​བདེ་བར་གཤེགས་ལ་པད་མའི་མེ་ཏོག་གཏོར། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་རིན་ཆེན་བཀོད་པ་ཁྱིམ་བདག་ཚེ། །​དེ་བཞིན་གཤེགས་པ་ངེས་པའི་བློ་དེ་ལ། །​ཁྲོན་པ་དག་ནི་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཤིན་ཏུ་བཟང་པོ་ལམ་སྟོན་བུར་གྱུར་ཚེ། །​དེ་བཞིན་གཤེགས་པ་གཏི་མུག་སྤངས་པ་དེ་ལ་ནི། །​ལྗོན་པོའི་ལྕུག་མ་ཉི་ཤུ་སྙེད་ནི་ཕུལ་ནས་ཀྱང་། །​དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་རིན་ཆེན་མཆོག་ནི་ཤིང་རྟ་མཁན་གྱི་ཚེ། །​བཅོམ་ལྡན་དེ་བཞིན་གཤེགས་པ་ཡོན་ཏན་ཕུང་པོ་དེའི། །​གཙུག་ལག་ཁང་གི་སྒོ་དག་བྱས་ཏེ་ཕུལ་ནས་ཀྱང་། །​དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཐུགས་ནི་ཤིན་ཏུ་གཞུངས་པ་ཕྱུགས་རྫིའི་ཚེ། །​དེ་བཞིན་གཤེགས་པ་བསྡུ་བའི་བློ་ནི་མངའ་བ་དེ།