།དེ་བཞིན་གཤེགས་པ་བསྡུ་བའི་བློ་ནི་མངའ་བ་དེ། །ལམ་སྲང་དག་ཏུ་གཤེགས་ཚེ་གོས་དག་བཏིང་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྒྱ་མཚོས་བྱིན་ནི་མདུན་འདོན་ཚེ། །དེ་བཞིན་གཤེགས་པ་སྐལ་ལྡན་ཤིང་རྟ་ལ། །མེ་ཏོག་དག་གི་གཞལ་མེད་ཁང་པ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཚངས་ཏོག་ཞིང་པའི་ཚེ། །དེ་བཞིན་གཤེགས་པ་བདེན་པའི་མཐུ་རྩལ་ལ། །མོ་སྲན་གྲེའུ་འབྲུ་སྤར་གང་གཏོར་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཟླ་གདུགས་ནིར་ཡུ་ཧ་ཀའི་ཚེ། །དེ་བཞིན་གཤེགས་པ་སྣ་ཚོགས་གསུང་དེ་ལ། །བྱུག་པ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འོད་འཕྲོ་སྤོས་འཚོང་གྱུར་པའི་ཚེ། །བདེ་གཤེགས་ཕྱོགས་རྣམས་གཟིགས་པ་སངས་རྒྱས་ཀྱི། །གཙུག་ལག་ཁང་དག་སྤོས་ཀྱིས་བདུགས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དྲི་མེད་རྒྱལ་པོ་ནི། །རི་མོ་མཁན་ཚེ་བདེ་གཤེགས་སྟོབས་གསལ་དེའི། །སྒོ་གང་དག་ནི་རི་མོ་བྲིས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡེ་ཤེས་གྲགས་པ་གོས་འཚོང་ཚེ། །དེ་བཞིན་གཤེགས་པ་ངེས་པར་རྟོགས་བཟོད་ལ། །ཆོས་གོས་སྲ་བརྐྱང་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཀུན་རྒྱལ་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་ཆོས་ཀྱི་གདུགས་དེ་ལ། །རིན་ཆེན་སེ་མོ་དོ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡོན་ཏན་འོད་ནི་མཐིང་མཁན་ཚེ། །དེ་བཞིན་གཤེགས་པ་ཚོགས་ཀྱིས་མི་ཐུབ་ལ། །མཐིང་ཕོར་གཅིག་ཅིག་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་སྒྲ་སྒྲོགས་གོས་འཚོང་ཚེ། །དེ་བཞིན་གཤེགས་པ་ལྷ་ཡི་མེ་ཏོག་ལ། །སྐུ་རེགས་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཟླ་རྒྱས་ཕྱུགས་རྫིའི་དཔོན་པོའི་ཚེ།