།དཔག་ཚད་བརྒྱ་ཡོད་ཡབ་ནི་ལེགས་བཟངས་ཡིན། །འོད་བཟངས་མ་ཞེས་བྱ་བ་རྒྱལ་བའི་ཡུམ། །སྲས་པོ་སྐར་མཁན་འབྱོར་པ་རིམ་གྲོ་པ། །ཡོན་ཏན་འོད་བཟངས་པ་ནི་མཁས་པ་སྟེ། །བཀོད་པ་མཐའ་ཡས་པ་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་གཉིས་ཀུན་ལའང་། །མཚོ་བྲན་རྒྱ་མཚོ་གང་བ་འདྲ་བ་པོ། །བྱེ་བ་ཕྲག་ནི་བདུན་ཅུ་བཞི་བཞི་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །ཞི་བར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་སུམ་ཁྲི་བཞི་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བརྒྱད་པ་ཐམས་ཅད་རྣམ་པར་བརྒྱན། །དེ་བཞིན་གཤེགས་པ་ནམ་མཁའི་དབྱིངས་སྐྱེ་བའི། །ཡུལ་ནི་རྫུ་འཕྲུལ་སྣང་བར་བྱེད་ཅེས་བྱ། །རྡུལ་བྲལ་རིགས་ནི་རྒྱལ་རིགས་འོད་ཀྱི་ཚད། །སྟོང་གསུམ་ཙམ་ཡིན་བདེ་བའི་དབང་པོ་ཡབ། །དགའ་བའི་སྒྲ་དབྱངས་རྒྱལ་ཡུམ་མེ་ཏོག་སྲས། །ཀུ་མུ་ད་ཞེས་བྱ་བ་རིམ་གྲོ་པ། །སེང་གེའི་རྒྱལ་མཚན་ཞེས་བྱ་མཁས་པ་སྟེ། །དབྱངས་སྙན་མཆོག་ཅེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་མཐའ་ཡས་ཀུན་ལ་ཡང་། །བརྟན་རྣམས་བྱང་ཆུབ་དག་ལ་གཞོལ་བ་པོ། །བྱེ་བ་ཕྲག་ནི་དཔག་ཏུ་མེད་པ་ཡོད། །མི་ཚེ་ལོ་གྲངས་ཐེར་འབུམ་ཕྲག་གསུམ་ཡིན། །བྱང་ཆུབ་ཏུ་ནི་ཡོངས་སུ་སྨིན་བྱའི་ཕྱིར། །དམ་ཆོས་ལོ་གྲངས་ཐེར་འབུམ་ཕྲག་གསུམ་གནས། །གྲགས་པ་མཐའ་ཡས་མྱ་ངན་འདས་ནས་ཀྱང་། །རྒྱལ་བའི་སྐུ་གདུང་དག་ནི་རྒྱས་པར་འགྱུར། །འཇིག་རྟེན་མགོན་པོ་ལྷ་ཡི་སྐྱེ་བ་ཡི། །ཡུལ་ནི་ངང་ཚུལ་ཀུན་དུ་སྡུད་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །སྟོང་ཁམས་གཉིས་ཙམ་ཡབ་ནི་སྒྲོན་མ་ཡིན། །སྤོབས་པའི་བློ་གྲོས་ཞེས་བྱ་རྒྱལ་བའི་ཡུམ། །སྲས་པོ་ལྷ་གསལ་འབྱོར་བྱེད་རིམ་གྲོ་པ། །མིག་ལེགས་པ་ཞེས་བྱ་བ་མཁས་པ་སྟེ། །ཤིན་ཏུ་སྦྱངས་པའི་ལུས་ནི་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་བཞི་ཀུན་ལའང་། །སེམས་ཅན་མཆོག་མ་བྱང་ཆུབ་འདོད་པ་པོ། །བྱེ་བ་ཕྲག་ནི་ཁྲི་ཕྲག་དགུ་དགུ་ཡོད། །མི་ཚེ་ལོ་གྲངས་དག་ནི་འབུམ་ཡང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་སྟོང་ཕྲག་བརྒྱད་ཁྲིའི་བར་དུ་གནས། །