མིག་སྦྱིན་མཛད་པ་མྱ་ངན་འདས་ནས་ཀྱང་། །རྒྱལ་བའི་སྐུ་གདུང་དག་ནི་རྒྱས་པར་འགྱུར། །དེ་བཞིན་གཤེགས་པ་ལྷ་ཡི་རྒྱལ་པོ་ཡི། །སྐྱེ་བའི་ཡུལ་ནི་ལྷ་ཡིས་མཆོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །སྟོང་ཁམས་གཅིག་ཙམ་ཡབ་ནི་ལྷ་བཟང་ཡིན། །ལྷ་ཡི་དབང་ཕྱུག་མ་ནི་རྒྱལ་བའི་ཡུམ། །སྲས་པོ་ལྷ་ཡིན་ལྷ་ནི་རིམ་གྲོ་པ། །ཚངས་པ་འཕགས་ཞེས་བྱ་བ་མཁས་པ་སྟེ། །ལྷ་དབང་གཙོ་བོ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །གཟུངས་ཐོབ་བྱང་ཆུབ་དག་ནི་འདོད་པ་པོ། །ཁྲི་ཕྲག་དག་ནི་དགུ་བཅུ་བཞི་བཞི་ཡོད། །མི་ཚེ་ལོ་གྲངས་བྱེ་སྟོང་དགུ་བཅུ་དགུ། །བྱང་ཆུབ་ཏུ་ནི་ཡོངས་སུ་སྨིན་བྱའི་ཕྱིར། །དམ་ཆོས་ལོ་གྲངས་བརྒྱད་འབུམ་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བཟང་པོས་ཞིང་རྣམས་གང་བར་འགྱུར། །དེ་བཞིན་གཤེགས་པ་ནོར་བུ་གསལ་བ་ཡི། །སྐྱེ་བའི་ཡུལ་ནི་རིན་ཆེན་གསལ་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་ཁྲི་ཡོད་ཡབ་ནི་གསལ་བ་ཡིན། །རིན་ཆེན་མཆོག་ཅེས་བྱ་བ་རྒྱལ་བའི་ཡུམ། །སྲས་པོ་དགའ་ལྡན་ལེགས་མཐོང་རིམ་གྲོ་པ། །མིག་སྡུག་པ་ཞེས་བྱ་བ་མཁས་པ་སྟེ། །རྟག་པ་མཐོང་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་གཉིས་ཀུན་ལའང་། །དགྲ་བཅོམ་ཟག་པ་མེད་པའི་བསམ་གཏན་པ། །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །མི་ཚེ་ལོ་གྲངས་བདུན་ཁྲི་བཞི་སྟོང་ཡིན། །འགོག་པར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་བདུན་ཁྲི་བཞི་སྟོང་བར་དུ་གནས། །སྐུ་གདུང་མཆོད་རྟེན་དཔག་ཚད་བརྒྱ་པ་གཅིག །གསེར་དང་ནོར་བུའི་ལྡ་ལྡིས་མཛེས་པར་བྱས། །དེ་བཞིན་གཤེགས་པ་ནོར་བཟང་སྐྱེ་བ་ཡི། །ཡུལ་ནི་བསོད་ནམས་རྣམ་པར་བརྒྱན་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དགུ་སྟོང་རབ་ཏུ་དགེ་བ་ཡབ། །ཐར་པའི་རྒྱལ་མཚན་ཞེས་བྱ་རྒྱལ་བའི་ཡུམ། །སྲས་པོ་སྟོན་བརྩེགས་རྒྱལ་བ་རིམ་གྲོ་པ། །ཡེ་ཤེས་ང་རོ་ཞེས་བྱ་མཁས་པ་སྟེ། །མཛེས་པར་གནས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ངར་མི་འཛིན་པ་ཡང་སྲིད་ཟད་པ་པོ།