།དཔག་ཚད་བརྒྱ་ཡོད་ཡབ་ནི་བློ་གྲོས་ཅན། །དགེ་བའི་བློ་གྲོས་ཞེས་བྱ་རྒྱལ་བའི་ཡུམ། །སྲས་པོ་བྱམས་ལྡན་གྲོགས་བཟང་རིམ་གྲོ་པ། །ཆུ་བོ་སྤོང་ཞེས་བྱ་བ་མཁས་པ་སྟེ། །གཟི་བརྗིད་རྣམ་པར་ངེས་པ་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །མཚུངས་མེད་ཆུ་དང་མཚུངས་པའི་བསམ་གཏན་པ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །སྲིད་པའི་མཐར་ཕྱིན་པ་ཡི་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །མཆོད་རྟེན་རིན་པོ་ཆེ་ཡིས་རབ་ཏུ་བརྒྱན། །བ་དན་དག་གིས་ཤིན་ཏུ་མཛེས་པར་བྱས། །དེ་བཞིན་གཤེགས་པ་འཁོར་ལོ་འཛིན་པ་ཡི། །སྐྱེ་ཡུལ་ཐུབ་པ་མེད་པའི་སྡེ་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་དགུ་ཡོད་ཡབ་ནི་ལྷ་དབང་ཡིན། །ཚོགས་རྒྱལ་འོད་ཅེས་བྱ་བ་རྒྱལ་བའི་ཡུམ། །སྲས་པོ་འབྱོར་པ་ལྷས་བྱིན་རིམ་གྲོ་པ། །ཐུབ་པ་མེད་པའི་འོད་ནི་མཁས་པ་སྟེ། །བཀོད་པ་ཁྱད་པར་འཕགས་པ་རྫུ་འཕྲུལ་ཅན། །འདུས་པ་ལན་གྲངས་བཅུ་གཉིས་ཀུན་ལ་ཡང་། །མཉམ་གྲོལ་རྒྱ་མཚོ་འདྲ་བའི་དགྲ་བཅོམ་པ། །ཐེར་འབུམ་ཐེར་འབུམ་དག་ནི་འདུས་པར་འགྱུར། །མི་ཚེ་ལོ་གྲངས་སུམ་ཁྲི་དྲུག་སྟོང་ཡིན། །རྣམ་པར་གྲོལ་བར་ཕྱིན་པའི་དམ་ཆོས་དག །ལོ་གྲངས་སུམ་ཁྲི་དྲུག་སྟོང་བར་དུ་གནས། །ཐུགས་རྗེ་ཆེན་པོ་མྱ་ངན་འདས་ནས་ཀྱང་། །རྒྱལ་བའི་སྐུ་གདུང་དག་ནི་རྒྱས་པར་འགྱུར། །དེ་བཞིན་གཤེགས་པ་དབྱིག་གི་མཆོག་དག་གི། །སྐྱེ་བའི་ཡུལ་ནི་རྐང་པ་བརྒྱན་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་ཁྲི་ཡོད་ཡབ་ནི་ཕན་འདོད་ཡིན། །དགའ་བའི་འོད་ཅེས་བྱ་བ་རྒྱལ་བའི་ཡུམ། །སྲས་པོ་ཟླ་བ་ཟླ་བཟངས་རིམ་གྲོ་པ། །མུན་དང་བྲལ་ཞེས་བྱ་བ་མཁས་པ་སྟེ། །ཆགས་དང་བྲལ་བར་གནས་པ་རྫུ་འཕྲུལ་ཅན། །འདུས་པ་ལན་གྲངས་བཅུ་གཅིག་ཀུན་ལ་ཡང་། །ལྷ་ཡི་མཐུ་ཅན་རྣམ་གྲོལ་དགའ་བ་པོ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་ཚེ་ལོ་གྲངས་དྲུག་ཁྲི་ཆིག་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་བདུན་ཁྲིའི་བར་དུ་གནས་པར་འགྱུར།