།དྲི་མ་ཀུན་དང་བྲལ་བས་བསམ་གཏན་པ། །བྱེ་བ་ཕྲག་ནི་སུམ་ཅུ་བཞི་བཞི་ཡོད། །མི་ཚེ་ལོ་གྲངས་སུམ་ཁྲི་ཆིག་སྟོང་ཡིན། །རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་སུམ་ཁྲི་ཉིས་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བྱེ་བ་སྟོང་ཕྲག་བརྒྱ་ཡང་འབྱུང་། །དེ་བཞིན་གཤེགས་པ་འོད་ནི་སྤྱོད་པ་ཡི། །སྐྱེ་བའི་ཡུལ་ནི་རྟག་ཏུ་དགའ་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དྲུག་ཅུ་ཡབ་ནི་མྱོས་མེད་ཡིན། །བསོད་ནམས་མཆོག་ཅེས་བྱ་བ་རྒྱལ་བའི་ཡུམ། །སྲས་པོ་ལྷ་ལྡན་སྡོམ་པ་རིམ་གྲོ་པ། །བསོད་ནམས་དཔལ་ཞེས་བྱ་བ་མཁས་པ་སྟེ། །འཁྲུག་པ་མེད་པར་གནས་པ་རྫུ་འཕྲུལ་ཅན། །འདུས་པ་ལན་གྲངས་བཅུ་གསུམ་ཀུན་ལ་ཡང་། །ཆགས་པ་མེད་པར་གྱུར་པའི་བསམ་གཏན་པ། །ཐེར་འབུམ་ཐེར་འབུམ་དག་ནི་འདུས་པར་འགྱུར། །མི་ཚེ་ལོ་གྲངས་དྲུག་ཁྲི་བཞི་སྟོང་ཡིན། །དམ་ཆོས་ལོ་གྲངས་ཆིག་ཁྲི་སུམ་སྟོང་གནས། །སྐུ་གདུང་མཆོད་རྟེན་དག་ནི་གཅིག་ཡིན་ཏེ། །དཔག་ཚད་བརྒྱད་པ་རྒྱན་གྱིས་བརྒྱན་བྱས་ཤིང་། །རྩེ་མོ་རིན་པོ་ཆེ་ཡིས་རབ་ཏུ་བརྒྱན། །དེ་བཞིན་གཤེགས་པ་ཀླུ་དབྱངས་སྐྱེ་བ་ཡི། །ཡུལ་ནི་ཀླུ་ཡིས་མཆོད་པ་བྱས་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་རྒྱ་ཆེན་ཡིན། །ཀླུ་ཡི་དབྱངས་ཞེས་བྱ་བ་རྒྱལ་བའི་ཡུམ། །སྲས་པོ་རྫུ་འཕྲུལ་སེང་གེ་རིམ་གྲོ་པ། །དགའ་བས་མཆོད་ཅེས་བྱ་བ་མཁས་པ་སྟེ། །སྟོན་པ་ཞེས་བྱ་རྫུ་འཕྲུལ་ཅན་གྱི་མཆོག །འདུས་པ་ལན་གྲངས་བདུན་ཅུ་ཀུན་ལ་ཡང་། །ལྷ་ཡི་གནས་པ་མཆོག་དག་ཐོབ་པ་པོ། །བྱེ་བ་ཕྲག་ནི་བདུན་ཅུ་བཞི་བཞི་ཡོད། །མི་ཚེ་ལོ་གྲངས་དགུ་ཁྲི་བཞི་སྟོང་ཡིན། །ཆགས་པ་མེད་པར་གྱུར་པའི་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །ཐུགས་རྗེ་ཆེན་པོ་མྱ་ངན་འདས་ནས་ཀྱང་། །རྒྱལ་བའི་སྐུ་གདུང་དག་ནི་རྒྱས་པར་འགྱུར། །དེ་བཞིན་གཤེགས་པ་གླུ་དབྱངས་སྐྱེ་བ་ཡི། །ཡུལ་ནི་དབྱངས་ཀྱི་མཆོག་མ་ཞེས་ཀྱང་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་བློ་གྲོས་ཅན།