།རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །བཅོ་ལྔ་པ་གཅིག་ཤིན་ཏུ་རྣམ་པར་སྤྲས། །དེ་བཞིན་གཤེགས་པ་སེང་གེའི་སྟབས་དག་གི །སྐྱེ་བའི་ཡུལ་ནི་མཐོང་བས་མཆོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དགུ་ཡོད་ཡབ་ནི་ཕན་འདོད་ཡིན། །ནོར་ལྷའི་བུ་འོད་ཅེས་བྱ་རྒྱལ་བའི་ཡུམ། །སྲས་པོ་ཏོག་ལྡན་འོད་འཕྲོ་རིམ་གྲོ་པ། །སེང་གེ་བློ་གྲོས་ཞེས་བྱ་མཁས་པ་སྟེ། །རྣམ་པར་སྒྲོགས་པའི་དབྱངས་ནི་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །བྱང་ཆུབ་མཆོག་རབ་ཆོས་ལ་ངེས་གྱུར་པ། །བྱེ་བ་ཕྲག་ནི་དགུ་བཅུ་གསུམ་གསུམ་ཡོད། །མི་ཚེ་ལོ་གྲངས་དགུ་ཁྲི་བཞི་སྟོང་ཡིན། །བྱང་ཆུབ་ཏུ་ནི་ཡོངས་སུ་སྨིན་བྱའི་ཕྱིར། །དམ་ཆོས་ལོ་གྲངས་བརྒྱད་ཁྲིའི་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་སྟོང་ཕྲག་མཐའ་ཡས་རྣམ་པར་སྤྲས། །འཇིག་རྟེན་མགོན་པོ་མི་གཡོ་སྐྱེ་བ་ཡི། །ཡུལ་ནི་བསོད་ནམས་རབ་ཏུ་གནས་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་ཐེར་འབུམ་ཡབ་ནི་ཡོན་ཏན་དོན། །ལྷ་ཡི་དབང་ཕྱུག་མ་ནི་རྒྱལ་བའི་ཡུམ། །སྲས་པོ་སྣང་ལྡན་འོད་བཟངས་རིམ་གྲོ་པ། །རྒྱན་བྱིན་པ་ནི་བློ་གྲོས་ཅན་ཡིན་ཏེ། །སྒྲོན་མ་ཁྱད་པར་འཕགས་པ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་ཀུན་ལ་ཡང་། །དགྲ་བཅོམ་ཞི་བ་དག་ལ་གཞོལ་བ་པོ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །དམ་ཆོས་ལོ་གྲངས་ཉི་ཁྲིའི་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །འཕང་དུ་དཔག་ཚད་གཅིག་སྲིད་འཕགས་པ་ལ། །རིན་ཆེན་ནོར་བུ་གསེར་གྱི་ལྡ་ལྡིས་སྤྲས། །འཇིག་རྟེན་མགོན་པོ་རབ་གསལ་སྐྱེ་བ་ཡི། །ཡུལ་ནི་འཇིགས་པ་མེད་པར་མཐོང་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་བསྟོད་པའི་འོད། །འོད་གསལ་བ་ཞེས་བྱ་བ་རྒྱལ་བའི་ཡུམ། །སྲས་པོ་ལྷ་མིན་རྒྱལ་བྱིན་རིམ་གྲོ་པ། །དགྲ་བཅོམ་འགྲོས་ཞེས་བྱ་བ་མཁས་པ་སྟེ། །སྒྲིབ་པ་མེད་པའི་ཏོག་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །དྲི་མ་ཀུན་དང་བྲལ་བས་བསམ་གཏན་པ།