དཔག་ཚད་ཐེར་འབུམ་ཡབ་ནི་ཕན་འདོད་ཡིན། །འཕགས་ལས་ཉན་ཞེས་བྱ་བ་རྒྱལ་བའི་ཡུམ། །སྲས་པོ་དེས་པ་གཟུགས་བཟང་རིམ་གྲོ་པ། །བསོད་ནམས་འགྲོས་ཞེས་བྱ་བ་མཁས་པ་སྟེ། །ཀུན་དུ་སྒྲོན་མ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །ཐམས་ཅད་རྒྱགས་དང་དྲེགས་འགྲོས་རབ་ཞི་བ། །བྱེ་བ་ཕྲག་ནི་ཁྲི་ཕྲག་བཅུ་བཅུ་ཡོད། །མི་ཚེ་ལོ་གྲངས་བདུན་ཁྲི་ཆིག་སྟོང་ཡིན། །དམ་ཆོས་ལོ་གྲངས་བྱེ་བའི་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བཟང་པོ་གྲངས་ནི་བདུན་འབུམ་སྟེ། །བཀོད་པ་ཐམས་ཅད་རིན་ཆེན་བརྒྱ་སྙེད་ཡིན། །འཇིག་རྟེན་མགོན་པོ་སྦྱིན་སྲེག་འོད་འཕྲོ་ཡི། །སྐྱེ་ཡུལ་མཆོད་རྟེན་སྣང་བར་བྱེད་ཅེས་བྱ། །དེ་ཡི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་སྟོང་ཡོད་ཡབ་ནི་མེ་ཏོག་བཟང་། །སཱ་ལའི་བདག་ཅེས་བྱ་བ་རྒྱལ་བའི་ཡུམ། །སྲས་པོ་ཟླ་ལྡན་ཞི་ལྡན་རིམ་གྲོ་པ། །བལྟ་ན་སྡུག་ཅེས་བྱ་བ་མཁས་པ་སྟེ། །ལེགས་མཐོང་དབྱངས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བཅུ་གཉིས་ཀུན་ལ་ཡང་། །བྱང་ཆུབ་མཆོག་ལ་ངེས་པར་གྱུར་པ་པོ། །བྱེ་བ་ཕྲག་ནི་བརྒྱ་བརྒྱ་འདུས་པར་འགྱུར། །མི་ཚེ་ལོ་གྲངས་ལྔ་ཁྲི་ལྔ་སྟོང་ཡིན། །དངོས་པོ་མེད་པར་ཕྱིན་པ་དེ་ཡི་ཆོས། །བྱང་ཆུབ་ཡོངས་སྨིན་བྱ་ཕྱིར་དམ་ཆོས་ཀུན། །ལོ་གྲངས་བྱེ་བ་ཕྲག་ནི་གསུམ་དུ་གནས། །རྒྱལ་བའི་སྐུ་གདུང་དག་ནི་རྒྱས་པར་འགྱུར། །ཡོན་ཏན་མཐའ་ཡས་གཟི་བརྗིད་ཕུང་པོ་ཡི། །སྐྱེ་ཡུལ་ཆོས་ཀྱི་ཡོན་ཏན་འབྱུང་གནས་ཡིན། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ལྔ་བཅུ་རྩ་དྲུག་ཡབ་ནི་ལྷ་དབང་ཡིན། །ཐར་པའི་འགྲོས་ཞེས་བྱ་བ་རྒྱལ་བའི་ཡུམ། །སྲས་པོ་སྐར་མཁན་འོད་ལྡན་རིམ་གྲོ་པ། །བྱམས་པའི་ང་རོ་ཞེས་བྱ་མཁས་པ་སྟེ། །ལྷ་ཡི་གཞལ་མེད་འདོད་པ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་ཀུན་ལ་ཡང་། །རི་དབང་རྒྱལ་པོ་མི་གཡོ་སྤ་བ་བཞིན། །བྱེ་བ་ཕྲག་ནི་སུམ་ཅུ་བཞི་བཞི་ཡོད། །མི་ཚེ་ལོ་གྲངས་སུམ་ཁྲི་བཞི་སྟོང་ཡིན། །སྣང་བ་མེད་པར་ཕྱིན་པའི་དམ་ཆོས་དག །ལོ་གྲངས་བཞི་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི།