།ཉོན་མོངས་བག་ཆགས་དྲི་ལས་གྲོལ་བ་པོ། །ཐེར་འབུམ་ཕྲག་ནི་དྲུག་ཅུ་དྲུག་ཅུ་ཡོད། །མི་ཚེ་ལོ་གྲངས་དྲུག་ཁྲི་ལྔ་སྟོང་ཡིན། །དམ་པའི་ཆོས་དག་ལོ་གྲངས་སྟོང་ཕྲག་ནི། །དྲུག་ཅུ་རྩ་ལྔའི་བར་དུ་གནས་པར་འགྱུར། །སྐུ་གདུང་མཆོད་རྟེན་དཔག་ཚད་བརྒྱ་པ་གཅིག །རིན་ཆེན་པད་མ་དག་གིས་འཁོར་བར་བསྐོར། །དེ་བཞིན་གཤེགས་པ་གསལ་བ་སྐྱེ་བ་ཡི། །ཡུལ་ནི་ལྷ་རྣམས་དད་པར་བྱེད་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །སུམ་ཅུ་རྩ་གཅིག་ཡབ་ནི་མཐུ་རྩལ་ཡིན། །ཟླ་བའི་འོད་ཅེས་བྱ་བ་རྒྱལ་བའི་ཡུམ། །སྲས་པོ་འཇིགས་མེད་ཆགས་མེད་རིམ་གྲོ་པ། །རླུང་ལྟར་འགྲོ་ཞེས་བྱ་བ་མཁས་པ་སྟེ། །ཐེ་ཙོམ་རྣམ་པར་གྲོལ་བ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་བཞི་ཀུན་ལའང་། །བྱེ་བ་ཕྲག་ནི་ཉི་ཤུ་གཉིས་གཉིས་དང་། །གཞན་ཡང་བྱེ་བ་འབུམ་ཕྲག་ལྔ་ལྔ་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་བདུན་ཁྲི་དྲུག་སྟོང་བར་དུ་གནས། །ལྷ་མི་དག་ལ་ཕན་དང་བདེ་བའི་ཕྱིར། །རྒྱལ་བའི་སྐུ་གདུང་དག་ནི་རྒྱས་པར་འགྱུར། །དེ་བཞིན་གཤེགས་པ་སྐལ་ལྡན་ཤིང་རྟ་ཅན། །སྐྱེ་ཡུལ་བདེན་ལ་དད་པར་བྱེད་ཅེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་གནས་པའི་དབང་པོ་ཡབ། །འཕགས་པའི་དོན་ཅེས་བྱ་བ་རྒྱལ་བའི་ཡུམ། །སྲས་པོ་དད་བྱེད་དཔའ་བོ་རིམ་གྲོ་པ། །བདུད་རྩིའི་འོད་ཅེས་བྱ་བ་མཁས་པ་སྟེ། །འབྱོར་པར་གནས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་གཉིས་ཀུན་ལའང་། །དགྲ་བཅོམ་ཐམས་ཅད་ཟག་པ་ཟད་པ་པོ། །ཐེར་འབུམ་ཕྲག་ནི་ལྔ་ལྔ་འདུས་པར་འགྱུར། །མི་ཚེ་ལོ་གྲངས་དྲུག་ཁྲི་དྲུག་སྟོང་ཡིན། །མྱ་ངན་འདས་པར་ཕྱིན་པའི་དམ་ཆོས་དག །ལོ་གྲངས་དྲུག་ཁྲི་དྲུག་སྟོང་བར་དུ་གནས། །སྐུ་གདུང་མཆོད་རྟེན་དཔག་ཚད་གསུམ་པ་གཅིག །གསེར་གྱི་རྒྱལ་མཚན་དག་གིས་འཁོར་བར་བསྐོར། །སེམས་ཅན་སྙིང་པོ་བསོད་ནམས་བློ་གྲོས་ཀྱི། །སྐྱེ་ཡུལ་ལྷ་རྣམས་དད་པར་བྱེད་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །