།ཡེ་ཤེས་དགའ་ཞེས་བྱ་བ་མཁས་པ་སྟེ། །ཡུལ་དུ་རྣམ་པར་གྲགས་པ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་ཀུན་ལ་ཡང་། །ཞི་བ་མི་སློབ་འབྲས་ལ་མངོན་དགའ་བ། །བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་སུམ་ཁྲི་སུམ་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་བདུན་ཁྲིའི་བར་དུ་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་བཅུ་གཉིས་པ། །རིན་ཆེན་བརྒྱ་ཡི་ལྡ་ལྡིས་མཛེས་པར་བྱས། །དེ་བཞིན་གཤེགས་པ་མྱ་ངན་རྒལ་བ་ཡི། །སྐྱེ་བའི་ཡུལ་ནི་རྟག་པར་དགའ་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །དགུ་བཅུ་རྩ་གཉིས་དྲང་སྲོང་ཆེན་པོ་ཡབ། །དོན་གྱི་འགྲོས་ཞེས་བྱ་བ་རྒྱལ་བའི་ཡུམ། །སྲས་པོ་ལྷ་མིན་ལྷ་ནི་རིམ་གྲོ་པ། །གྲགས་པའི་ཏོག་ཅེས་བྱ་བ་མཁས་པ་སྟེ། །རྣམ་པར་གྲོལ་བར་གནས་པ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་གཉིས་ཀུན་ལའང་། །ལྷ་ཡི་གནས་པའི་ཕ་མཐར་ཕྱིན་པ་པོ། །བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་སུམ་ཁྲི་དྲུག་སྟོང་ཡིན། །དངོས་པོ་མེད་པར་ཕྱིན་པའི་དམ་ཆོས་དག །ལོ་གྲངས་སུམ་ཁྲི་བཞི་སྟོང་བར་དུ་གནས། །རྒྱལ་བ་ཡོངས་སུ་མྱ་ངན་འདས་ནས་ཀྱང་། །ཐུགས་རྗེ་ཆེན་པོའི་སྐུ་གདུང་རྒྱས་པར་འགྱུར། །དེ་བཞིན་གཤེགས་པ་དགེ་བ་དགྱེས་པ་ཡི། །སྐྱེ་བའི་ཡུལ་ནི་ཡིད་འོང་དགའ་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་བརྟུལ་ཞུགས་དོན། །དགེ་བའི་བློ་གྲོས་ཞེས་བྱ་རྒྱལ་བའི་ཡུམ། །སྲས་པོ་ལྟ་བྱེད་ཚངས་བྱིན་རིམ་གྲོ་པ། །སེང་གེའི་ང་རོ་ཞེས་བྱ་མཁས་པ་སྟེ། །འབྲུག་སྒྲ་སྒྲོགས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །བྱེ་བ་ཕྲག་ནི་དགུ་བཅུ་དགུ་དགུ་དང་། །གཞན་ཡང་ས་ཡ་ཕྲག་ནི་དྲུག་དྲུག་ཡོད། །མི་ཚེ་ལོ་གྲངས་དགུ་ཁྲི་དགུ་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་དགུ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །ལྔ་པ་གཅིག་སྟེ་རིན་ཆེན་བདུན་ལས་བྱས། །དེ་བཞིན་གཤེགས་པ་འགྲོ་བའི་བློ་གྲོས་ཀྱི། །སྐྱེ་བའི་ཡུལ་ནི་ལྷ་ཡི་འོད་ཅེས་བྱ།