།རྣམ་གྲོལ་ཐོབ་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་སྟོང་དུ་གནས་པར་འགྱུར། །འགྲོ་ལ་ཕན་ཕྱིར་རྒྱལ་བའི་སྐུ་གདུང་དག །རྒྱས་འགྱུར་ཞིང་རྣམས་ཀུན་ཏུ་གང་བར་འགྱུར། །སངས་རྒྱས་སྤོབས་པ་མཐའ་ཡས་ཏོག་སྐྱེ་བའི། །ཡུལ་ནི་ཡུལ་འཁོར་ཁ་ལོ་སྒྱུར་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་ཡོན་ཏན་དོན། །དོན་ལྡན་མ་ཞེས་བྱ་བ་རྒྱལ་བའི་ཡུམ། །སྲས་པོ་བདེན་བྱིན་ལེགས་འབྱོར་རིམ་གྲོ་པ། །མཐོང་དགའ་ཞེས་ནི་བྱ་བ་མཁས་པ་སྟེ། །བཀོད་པ་གསལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་མཐའ་ཡས་ཀུན་ལ་ཡང་། །བྱང་ཆུབ་མཆོག་ལ་ངེས་པར་གྱུར་པ་པོ། །དེ་དག་ཐམས་ཅད་བྱེ་བ་དཔག་ཏུ་མེད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །བདེ་བར་གཤེགས་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་བདུན་འབུམ་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །རིན་ཆེན་བདུན་པོ་དག་ཀྱང་འབྱུང་བར་འགྱུར། །དེ་བཞིན་གཤེགས་པ་བརྟུལ་ཞུགས་བསྟར་བ་ཡི། །སྐྱེ་ཡུལ་བསམ་པ་བཞིན་དུ་སྦྱིན་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱད་བརྒྱ་ཡབ་ནི་ཡོན་ཏན་འོད། །དགའ་བའི་འོད་ཅེས་བྱ་བ་རྒྱལ་བའི་ཡུམ། །སྲས་པོ་བྲམ་ཟེ་རབ་སྡུག་རིམ་གྲོ་པ། །གླང་པོའི་སྟབས་ཞེས་བྱ་བ་མཁས་པ་སྟེ། །གནས་པ་ཁྱད་པར་འཕགས་པ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་གཉིས་ཀུན་ལའང་། །གཡོ་མེད་ཡིད་ལྡན་ལེགས་པར་གནས་པ་པོ། །དེ་དག་ཐེར་འབུམ་ཕྲག་ནི་བཅུ་བཅུ་ཡོད། །མི་ཚེ་ལོ་གྲངས་དྲུག་ཁྲི་དྲུག་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲི་བདུན་སྟོང་བར་དུ་གནས། །སྐུ་གདུང་མཆོད་རྟེན་དཔག་ཚད་ལྔ་པ་གཅིག །ནོར་བུ་རིན་ཆེན་ལྡ་ལྡི་སྟོང་གིས་སྤྲས། །མཚུངས་པ་མེད་པའི་མཆོད་པའི་གནས་དག་གི། །སྐྱེ་བའི་ཡུལ་ནི་ཡུལ་འཁོར་མཆོག་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་ལྔ་བརྒྱ་ཡབ་ནི་ཏོག་བཟངས་ཡིན། །བྱས་པ་གདོན་མི་ཟ་བ་རྒྱལ་བའི་ཡུམ། །སྲས་པོ་སྐལ་བཟང་ཐུབ་དཀའ་རིམ་གྲོ་པ། །ཡེ་ཤེས་དགའ་ཞེས་བྱ་བ་མཁས་པ་སྟེ།