།རྒྱལ་བ་གཏི་མུག་རབ་ཟད་སྐྱེ་བ་ཡི། །ཡུལ་ནི་མཁས་པར་སྣང་བར་བྱེད་ཅེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་སྟོང་ཡོད་ཡབ་ནི་ཁྱད་པར་འཕགས། །གཟི་ལྡན་དགའ་ནི་རྒྱལ་ཡུམ་སྲས་པོ་ནི། །ཤིང་རྟ་དགའ་ཡིན་སྤྲིན་ལྡན་རིམ་གྲོ་པ། །ཏོག་གི་འོད་ཅེས་བྱ་བ་མཁས་པ་སྟེ། །སྒྲ་མཆོག་ཅེས་ནི་བྱ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་གསུམ་ཀུན་ལའང་། །ང་རྒྱལ་རྒྱལ་མཚན་ཆུར་ནི་ལྷུང་བ་པོ། །བྱེ་བ་ཕྲག་ནི་དྲུག་ཅུ་གཉིས་གཉིས་ཡོད། །མི་ཚེ་ལོ་གྲངས་སུམ་ཁྲི་བདུན་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག ། ལོ་གྲངས་སུམ་ཁྲི་བཞི་སྟོང་བར་དུ་གནས། །འགྲོ་ལ་ཕན་ཕྱིར་རྒྱལ་བའི་སྐུ་གདུང་དག །རྒྱས་འགྱུར་ཞིང་རྣམས་རྣམ་པར་གང་བར་འགྱུར། །སེམས་ཅན་སྙིང་པོ་དཔག་ཏུ་མེད་པ་ཡི། །སྐྱེ་བའི་ཡུལ་ནི་མི་ཟད་མཛོད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །དུང་ཕྱུར་ཕྲག་བརྒྱད་ཡབ་ནི་ལག་བཟངས་ཡིན། །དག་པའི་འོད་ནི་རྒྱལ་ཡུམ་སྒྲ་གཅན་འཛིན། །སྲས་ནི་ལྷ་ཡི་དབང་པོ་རིམ་གྲོ་པ། །མཐུ་རྩལ་སྟོབས་ཞེས་བྱ་བ་མཁས་པ་སྟེ། །ཀུན་ཏུ་གསལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་ཀུན་ལ་ཡང་། །ཐོས་པའི་མཛོད་ལྡན་རྒྱ་མཚོ་འདྲ་མཚུངས་པ། །དེ་དག་ཐེར་འབུམ་ཐེར་འབུམ་འདུས་པར་འགྱུར། །མི་ཚེ་ལོ་གྲངས་དག་ནི་ལྔ་ཁྲི་ཡིན། །དམ་ཆོས་ལོ་གྲངས་ཆིག་ཁྲི་ཆིག་སྟོང་གནས། །རྡུལ་བྲལ་མཆོད་རྟེན་དཔག་ཚད་བརྒྱད་པ་སྟེ། །རིན་ཆེན་བརྒྱ་ཡི་ལྡ་ལྡིས་མཛེས་བྱས་ཤིང་། །ནོར་བུའི་དྲ་བ་དག་གིས་ཀུན་ཏུ་བརྒྱན། །དེ་བཞིན་གཤེགས་པ་ཟླ་བ་བཟང་པོ་ཡི། །སྐྱེ་བའི་ཡུལ་ནི་ཟླ་བའི་འོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་སྒྲོན་མ་ཡིན། །ལྷ་ཡི་འོད་ཅེས་བྱ་བ་རྒྱལ་བའི་ཡུམ། །སྲས་པོ་ལྷ་ལེགས་བརྟན་པ་རིམ་གྲོ་པ། །མཐུ་རྩལ་སྟོབས་ཞེས་བྱ་བ་མཁས་པ་སྟེ། །མཆོག་གི་རྒྱལ་པོ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །དགྲ་བཅོམ་ཡིད་བཞིན་དུ་ནི་རྫོགས་པ་པོ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །རྣམ་གྲོལ་ཐོབ་པ་མྱ་ངན་འདས་ནས་ཀྱང་།