།དཔག་ཚད་ལྔ་པ་བླ་རེས་མཛེས་པར་བྱས། །རྒྱལ་བ་སྒྲ་གཅན་ཉི་མའི་སྙིང་པོ་ཡི། །སྐྱེ་ཡུལ་འཇིག་རྟེན་ཤིན་ཏུ་འཕགས་ཞེས་བྱ། །རིགས་ནི་རྒྱལ་རིགས་སྟོང་གསུམ་འོད་དག་གིས། །རྒྱས་འགྱུར་ཤིང་རྟ་འདྲེན་པའི་དབང་པོ་ཡབ། །ནམ་མཁའ་དགའ་ཞེས་བྱ་བ་རྒྱལ་བའི་ཡུམ། །སྲས་པོ་གཟི་ལེགས་ཆོས་ལྡན་རིམ་གྲོ་པ། །རྒྱལ་བའི་མཆོད་རྟེན་ཞེས་བྱ་མཁས་པ་སྟེ། །མཆོག་གི་རྒྱལ་པོ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་ཀུན་ལ་ཡང་། །བླ་མེད་བྱང་ཆུབ་དག་ལ་ངེས་གྱུར་པ། །བྱེ་བ་ཕྲག་ནི་བདུན་ཅུ་བརྒྱད་བརྒྱད་ཡོད། །མི་ཚེ་ལོ་གྲངས་དག་ནི་དུང་ཕྱུར་ཡིན། །དམ་པའི་ཆོས་དག་ལོ་གྲངས་ཁྲི་ཕྲག་ནི། །ཐེར་འབུམ་བརྒྱད་ཅུའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ཏེ། །སྟོང་གསུམ་འཇིག་རྟེན་ཐམས་ཅད་གང་བར་འགྱུར། །དེ་བཞིན་གཤེགས་པ་ལྷ་ཡིས་མཆོད་པ་ཡི། །སྐྱེ་བའི་ཡུལ་ནི་ལྷ་དད་ཅེས་ཀྱང་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་ཏོག་བཟང་ཡིན། །མེ་ཏོག་འོད་ཅེས་བྱ་བ་རྒྱལ་བའི་ཡུམ། །སྲས་པོ་ཙན་དན་ཙམ་ཀ་རིམ་གྲོ་པ། །ལྷ་ཡི་ཁ་ལོ་སྒྱུར་བ་མཁས་པ་སྟེ། །ཀླུ་ཡིས་འཇིགས་པ་མེད་པ་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །བདུད་རྩིའི་གོ་འཕང་ཞི་ལ་ལེགས་དུལ་བ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་དགུ་ཁྲི་བཞི་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲིའི་དྲུག་སྟོང་བར་དུ་གནས། །སངས་རྒྱས་ཡོངས་སུ་མྱ་ངན་འདས་ནས་ཀྱང་། །འཇིག་རྟེན་ཕན་ཕྱིར་སྐུ་གདུང་རྒྱས་པར་འགྱུར། །དེ་བཞིན་གཤེགས་པ་ཐར་པའི་རྒྱལ་མཚན་གྱི། །སྐྱེ་ཡུལ་འཇིག་རྟེན་དད་པར་བྱེད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །དགུ་བཅུ་རྩ་དགུ་ཡབ་ནི་སྟེགས་བཟངས་ཡིན། །སངས་རྒྱས་དབྱངས་ཞེས་བྱ་བ་རྒྱལ་བའི་ཡུམ། །སྲས་པོ་ཤེས་མཆོག་ཤེས་ལེགས་རིམ་གྲོ་པ། །གསེར་མཆོག་བརྩེགས་ཞེས་བྱ་བ་མཁས་པ་སྟེ། །དབྱངས་མཆོག་ཁྱད་པར་འཕགས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །འཇིག་རྟེན་ཆོས་ལས་རྣམ་གྲོལ་བསམ་གཏན་པ།