།དཔག་ཚད་ཉི་ཤུ་ཟླ་བའི་དབང་པོ་ཡབ། །ཟླ་བའི་ཏོག་ཅེས་བྱ་བ་རྒྱལ་བའི་ཡུམ། །སྲས་པོ་མཆོག་མ་དེས་པ་རིམ་གྲོ་པ། །ཕྱོགས་མཆོད་པ་ཞེས་བྱ་བ་མཁས་པ་སྟེ། །ཡེ་ཤེས་དགེ་བ་འཆད་པ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་བཞི་ཀུན་ལའང་། །དགྲ་བཅོམ་ཞི་བའི་ཡིད་ལྡན་བསམ་གཏན་པ། །ཐེར་འབུམ་ཐེར་འབུམ་དག་ནི་འདུས་པར་འགྱུར། །མི་ཚེ་ལོ་གྲངས་སུམ་ཁྲི་དྲུག་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བདུན་པ་ཀུན་ནས་མཛེས་པར་བྱས། །དེ་བཞིན་གཤེགས་པ་མེ་ཏོག་འོད་དག་གི། །སྐྱེ་བའི་ཡུལ་ནི་གཟི་བརྗིད་འཕགས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱད་ཅུ་ཡབ་ནི་ཞུམ་མེད་ཡིན། །ཡོན་ཏན་རྟོགས་བྱེད་མ་ནི་རྒྱལ་བའི་ཡུམ། །སྲས་པོ་ཀུན་རྒྱལ་རྒྱལ་དཀའ་རིམ་གྲོ་པ། །ཡོན་ཏན་དབང་ཕྱུག་ཅེས་བྱ་མཁས་པ་སྟེ། །རབ་ཏུ་ཞི་བར་གནས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །མ་སྨད་རྨ་མ་བྱུང་བའི་དགྲ་བཅོམ་པ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །གྲགས་པ་མཐའ་ཡས་མྱ་ངན་འདས་ནས་ཀྱང་། །དམ་ཆོས་ལོ་གྲངས་དགུ་ཁྲིར་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ཏེ། །འཇིག་རྟེན་ཞིང་རྣམས་ཀུན་ཏུ་གང་བར་འགྱུར། །སངས་རྒྱས་ཁམས་གསུམ་དག་གི་མཆོད་གནས་ཀྱི། །སྐྱེ་བའི་ཡུལ་ནི་ཡུལ་འཁོར་འཕེལ་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་གསུམ་ཡོད་ཡབ་ནི་ལག་བཟངས་ཡིན། །དགེ་བའི་དབང་ཕྱུག་མ་ནི་རྒྱལ་བའི་ཡུམ། །སྲས་པོ་སྐར་མཁན་མིག་ལྡན་རིམ་གྲོ་པ། །ཤེས་རབ་དགའ་བའི་དབྱངས་ནི་བློ་ཅན་ཏེ། །མཐའ་ཡས་གནས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །བྱང་ཆུབ་སྤྱོད་པ་མཆོག་ལ་ངེས་གྱུར་པ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་ལྔ་པ་བླ་རེས་མཛེས་པར་བྱས།