།འདུས་པ་ལན་གྲངས་ཉི་ཤུ་གཉིས་ཀུན་ལའང་། །དགྲ་བཅོམ་བྱེ་བ་ཕྲག་ནི་བརྒྱད་བརྒྱད་དང་། །གཞན་ཡང་ས་ཡ་ཕྲག་ནི་གཉིས་གཉིས་ཡོད། །མི་ཚེ་ལོ་གྲངས་བདུན་ཁྲི་དྲུག་སྟོང་ཡིན། །རྒྱལ་བ་ཡོངས་སུ་མྱ་ངན་འདས་ནས་ཀྱང་། །དམ་ཆོས་ལོ་གྲངས་སུམ་ཁྲིར་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །བཅུ་གཉིས་པ་གཅིག་མུ་ཏིག་བླ་རེར་ལྡན། །འཇིག་རྟེན་མགོན་པོ་བདུད་རྩི་སྐྱེ་བ་ཡི། །ཡུལ་ནི་གཟི་བརྗིད་དཔག་ཏུ་མེད་ཅེས་བྱ། །དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བཅུ་གཉིས་ཡབ་ནི་མཐའ་ཡས་ཡིན། །ང་རོ་མཐའ་ཡས་རྒྱལ་ཡུམ་སྲས་པོ་ནི། །ཀུ་མུ་ད་ཡིན་ལྟ་བྱེད་རིམ་གྲོ་པ། །འཇིག་རྟེན་དགའ་ཞེས་བྱ་བ་མཁས་པ་སྟེ། །འཇིག་རྟེན་དད་པར་བྱེད་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །གང་ཟག་དམ་པ་དགྲ་ནི་ཆོམས་པ་པོ། །བྱེ་བ་ཕྲག་ནི་བདུན་ཅུ་བཞི་བཞི་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་ཆིག་ཁྲི་སུམ་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བྱེ་བ་སྟོང་ཕྲག་དགུ་བཅུ་འབྱུང་། །དེ་བཞིན་གཤེགས་པ་ཆོས་སྟོབས་སྐྱེ་བའི་ཡུལ། །བསོད་ནམས་ཏོག་གི་རྒྱལ་མཚན་ཞེས་ཀྱང་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་གསུམ་ཡོད་ཡབ་ནི་ཚངས་བཟངས་ཡིན། །ཚངས་པའི་མཆོད་རྟེན་རྒྱལ་ཡུམ་སྲས་པོ་ནི། །དབང་པོ་ཐུལ་ཡིན་ཞི་བ་རིམ་གྲོ་པ། །ཡོན་ཏན་སྣང་བར་བྱེད་པ་མཁས་པ་སྟེ། །ཡོན་ཏན་མཆོག་ལ་གནས་པ་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་དྲུག་ཀུན་ལའང་། །རྡུལ་ཞི་དྲི་མ་གསུམ་དང་བྲལ་བ་པོ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་ཚེ་ལོ་གྲངས་དགུ་ཁྲི་བཞི་སྟོང་ཡིན། །བློ་གྲོས་མཐའ་ཡས་པ་ཡི་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །བཅུ་གཅིག་པ་གཅིག་རིན་ཆེན་དྲ་བར་ལྡན། །དེ་བཞིན་གཤེགས་པ་མཆོད་ལྡན་སྐྱེ་བའི་ཡུལ། །བསོད་ནམས་དག་གིས་བསྒྲུབས་པ་ཞེས་ཀྱང་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་ཉི་ཤུ་ཟླ་བའི་དབང་པོ་ཡབ།