དཔག་ཚད་བརྒྱ་ཡོད་ཡབ་ནི་དྲན་ལྡན་ཡིན། །དགེ་བའི་ང་རོ་ཞེས་བྱ་རྒྱལ་བའི་ཡུམ། །སྲས་པོ་མེ་ཏོག་མཁས་པ་རིམ་གྲོ་པ། །ཡོན་ཏན་ཁ་ལོ་སྒྱུར་བ་བློ་ཅན་ཏེ། །ཕན་འདོད་མཐའ་ཡས་པ་ནི་རྫུ་འཕྲུལ་ཅན། །འདུས་པ་ལན་གྲངས་བརྒྱ་སྟེ་ཀུན་ལ་ཡང་། །སྲིད་པ་སྤངས་པའི་སེམས་དང་ལྡན་པ་པོ། །དེ་དག་ཐེར་འབུམ་ཕྲག་ནི་བཅུ་བཅུ་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །སྣང་མེད་ཐོབ་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་སྟོང་གི་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བྱེ་བ་བརྒྱ་ཕྲག་དགུ་བཅུ་འབྱུང་། །དེ་བཞིན་གཤེགས་པ་སྤོབས་པའི་ཚོགས་དག་གི། །སྐྱེ་བའི་ཡུལ་ནི་མཆོད་ཅིང་བསྒོམས་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །དགུ་བཅུ་གསུམ་ཡོད་ཡབ་ནི་རྟོགས་ལྡན་ཡིན། །ཡེ་ཤེས་སྟོབས་ཞེས་བྱ་བ་རྒྱལ་བའི་ཡུམ། །སྲས་པོ་འཕགས་པ་དགྲ་བཅོམ་རིམ་གྲོ་པ། །ཡོན་ཏན་ཕུང་པོ་ཞེས་བྱ་མཁས་པ་སྟེ། །ཡེ་ཤེས་ཡོན་ཏན་འབྱུང་གནས་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །འགྲོ་བའི་མཆོག་ལ་དགའ་བའི་དགྲ་བཅོམ་པ། །བྱེ་བ་ཕྲག་ནི་སུམ་ཅུ་རེ་རེ་ཡོད། །མི་ཚེ་ལོ་གྲངས་ཉིས་ཁྲི་ཉིས་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲི་དྲུག་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བརྒྱད་པ་གསེར་གྱིས་རྣམ་པར་སྤྲས། །འཇིག་རྟེན་མཆོག་མ་མཆོད་སྦྱིན་བཟང་པོ་ཡི། །སྐྱེ་བའི་ཡུལ་ནི་མཆོད་སྦྱིན་གསལ་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །སུམ་ཅུ་རྩ་ལྔ་མཆོད་སྦྱིན་བཟང་པོ་ཡབ། །ཐར་པའི་ང་རོ་རྒྱལ་ཡུམ་སྲས་པོ་ནི། །བསོད་ནམས་འབྱུང་གནས་རྒྱལ་བ་རིམ་གྲོ་པ། །ངེས་པས་བྱས་ཞེས་བྱ་བ་མཁས་པ་སྟེ། །འཇིགས་པ་མེད་པའི་སྟོབས་ནི་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །དགྲ་བཅོམ་ཐམས་ཅད་ཆགས་པ་མེད་གྱུར་པ། །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་ལྔ་སྟོང་བར་དུ་གནས་པར་འགྱུར།