།བྱང་ཆུབ་སེམས་དཔའི་འཁོར་རྣམས་འབྱུང་བར་འགྱུར། །མི་ཚེ་ལོ་གྲངས་དག་ནི་བརྒྱད་འབུམ་ཡིན། །བྱང་ཆུབ་བསྲུང་ཕྱིར་དམ་པའི་ཆོས་དག་ཀྱང་། །ལོ་གྲངས་བརྒྱད་འབུམ་བར་དུ་གནས་པར་འགྱུར། །རྒྱལ་བའི་སྐུ་གདུང་རྒྱས་འགྱུར་ཞིང་རྣམས་གང་། །གསེར་རྒྱན་བྱེ་བ་དག་གིས་བརྒྱན་པར་འགྱུར། །སངས་རྒྱས་ཡོན་ཏན་འོད་ཟེར་གཟི་བརྗིད་ཀྱི། །སྐྱེ་ཡུལ་ཡོན་ཏན་ཀུན་དང་ལྡན་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །སུམ་ཅུ་རྩ་གཉིས་ཡབ་ནི་ཡོན་ཏན་འོད། །ཡོན་ཏན་འོད་བཟངས་རྒྱལ་ཡུམ་སྲས་པོ་ནི། །ཡོན་ཏན་རྒྱ་མཚོ་ཟླ་བ་རིམ་གྲོ་པ། །ཟླ་བ་འཕགས་ཞེས་བྱ་བ་མཁས་པ་སྟེ། །ཡོན་ཏན་མཆོག་གིས་མཆོད་པ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་དྲུག་ཀུན་ལའང་། །ཡོན་ཏན་ཀུན་གྱི་ཕ་རོལ་ཕྱིན་པ་པོ། །ཐེར་འབུམ་ཐེར་འབུམ་དག་ནི་འདུས་པར་འགྱུར། །མི་ཚེ་ལོ་གྲངས་དག་ནི་དྲུག་ཁྲི་ཡིན། །འགྲོ་ལ་ཕན་ཕྱིར་མྱ་ངན་འདས་ནས་ཀྱང་། །དམ་ཆོས་ལོ་གྲངས་སྟོང་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །འགྲོ་བ་ཀུན་གྱིས་མཆོད་ཅིང་བཀུར་བར་འགྱུར། །མི་ཡི་འདྲེན་པ་དྲང་སྲོང་དབང་པོ་ཡི། །སྐྱེ་བའི་ཡུལ་ནི་འཕགས་པས་བལྟས་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །བདུན་ཅུ་རྩ་གསུམ་ཡབ་ནི་གསལ་བ་ཡིན། །འཕགས་མཉམ་མ་ནི་རྒྱལ་ཡུམ་དྲང་སྲོང་བྱིན། །སྲས་ཡིན་འཕགས་པའི་མེ་ཏོག་རིམ་གྲོ་པ། །ཡོན་ཏན་གཟི་བརྗིད་འཆང་བ་བློ་ཅན་ཏེ། །ཡེ་ཤེས་རྣམ་པར་འཕྲུལ་པ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་གསུམ་ཀུན་ལའང་། །མིང་རྣམས་གསལ་ཞིང་མདུད་པ་སྤངས་པ་པོ། །བྱེ་བ་སྟོང་ཕྲག་དག་ནི་གསུམ་གསུམ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །མཐའ་ཡས་འདུལ་བར་མཛད་པའི་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བརྒྱད་པ་ནོར་བུས་རྣམ་པར་སྤྲས། །མི་ཡི་འདྲེན་པ་བློ་དང་ལྡན་པ་ཡི། །སྐྱེ་བའི་ཡུལ་ནི་མཛངས་པས་བལྟས་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །