།སྲས་པོ་གྲགས་འཛིན་ཟླ་སྡུག་རིམ་གྲོ་པ། །སྙན་པར་གྲགས་པ་ཐོབ་པ་བློ་ཅན་ཏེ། །སྙན་པར་གྲགས་པ་གསལ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །འཇིག་རྟེན་དག་གིས་མཆོད་འོས་དགྲ་བཅོམ་པ། །བྱེ་བ་ཕྲག་ནི་ཁྲི་ཕྲག་བཅུ་བཅུ་ཡོད། །མི་ཚེ་ལོ་གྲངས་བྱེ་བ་བདུན་ཅུ་དྲུག །སེམས་ཅན་སྙིང་པོའི་དམ་པའི་ཆོས་དག་ཀྱང་། །ལོ་གྲངས་བྱེ་བ་ཉི་ཤུ་གཉིས་སུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་དེ་ཀུན་རིན་ཆེན་བདུན་ལས་བྱས། །དེ་བཞིན་གཤེགས་པ་ཆོས་ཀྱི་རྒྱལ་མཚན་གྱི། །སྐྱེ་བའི་ཡུལ་ནི་ཡེ་ཤེས་ཚོགས་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་ཉི་ཤུ་ཡབ་ནི་མྱ་ངན་མེད། །རིན་ཆེན་རྒྱལ་མཚན་ཞེས་བྱ་རྒྱལ་བའི་ཡུམ། །སྲས་པོ་ཤེས་མཆོག་འཕགས་པ་རིམ་གྲོ་པ། །བདུད་རྩིའི་རྒྱལ་མཚན་ཞེས་བྱ་མཁས་པ་སྟེ། །འཇིགས་པ་མེད་པར་གྲགས་པ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་གཉིས་ཀུན་ལའང་། །འཇིག་རྟེན་ཆོས་བརྒྱད་དག་ལས་གྲོལ་བ་པོ། །བྱེ་བ་ཕྲག་ནི་བདུན་ཅུ་བདུན་ཅུ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །དམ་ཆོས་ལོ་གྲངས་བརྒྱད་ཁྲིའི་བར་དུ་གནས། །རྒྱལ་བའི་སྐུ་གདུང་དག་གི་མཆོད་རྟེན་ནི། །དཔག་ཚད་བཅུ་པ་གཅིག་སྟེ་གདུགས་ཀྱི་གྲངས། །སྟོང་ཕྲག་བདུན་ཅུ་སྙེད་ཀྱིས་རྣམ་པར་བརྒྱན། །སངས་རྒྱས་ཡེ་ཤེས་ང་རོ་སྐྱེ་བ་ཡི། །ཡུལ་ནི་ཡེ་ཤེས་རབ་ཏུ་གནས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་ཡོན་ཏན་མཆོག །གཙོ་འོད་མ་ཞེས་བྱ་བ་རྒྱལ་བའི་ཡུམ། །སྲས་པོ་སྡེ་བཟངས་ཁྱད་འཕགས་རིམ་གྲོ་པ། །ཆོས་ཀྱི་སྒྲ་ཞེས་བྱ་བ་མཁས་པ་སྟེ། །ཐར་པའི་སྒྲ་དབྱངས་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ལྔ་ཀུན་ལའང་། །དགྲ་བཅོམ་བྱས་བསྲུངས་ཤེས་རབ་རྣམ་གྲོལ་བ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་བདུན་ཁྲི་བཞི་སྟོང་ཡིན། །གྲགས་པ་མཐའ་ཡས་མྱ་ངན་འདས་ནས་ཀྱང་། །དམ་ཆོས་ལོ་གྲངས་སྟོང་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བྱེ་སྟོང་སྙེད་ཀྱིས་གང་བར་འགྱུར།