།རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བརྒྱ་པ་ཁོར་ཡུག་བླ་རེར་ལྡན།། །།འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ཉི་ཤུ་པ། འཇིག་རྟེན་བླ་མ་འབྱོར་པར་ལྡན་པ་ཡི། །སྐྱེ་བའི་ཡུལ་ནི་རིན་ཆེན་བརྒྱན་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་བློ་གྲོས་ཅན། །ཡོན་ཏན་ཚོགས་ནི་རྒྱལ་ཡུམ་ཡོན་ཏན་མཆོག །སྲས་ཡིན་ཡོན་ཏན་གཟི་བརྗིད་རིམ་གྲོ་པ། །ཡོན་ཏན་གཟི་བརྗིད་འཆང་བ་བློ་ཅན་ཏེ། །ཡོན་ཏན་ཀུན་གྱིས་མཆོད་པ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །སྲེད་ལྕུགས་དྲ་བ་དག་ལས་གྲོལ་བ་པོ། །བྱེ་བ་ཕྲག་ནི་བདུན་ཅུ་བདུན་ཅུ་ཡོད། །མི་ཚེ་ལོ་གྲངས་བདུན་ཁྲི་ཉིས་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བརྒྱད་ཁྲི་བདུན་སྟོང་བར་དུ་གནས། །ཁམས་གསུམ་ཀུན་གྱི་འགྲོ་ལ་ཕན་པའི་ཕྱིར། །རྒྱལ་བའི་སྐུ་གདུང་དག་ནི་རྒྱས་པར་འགྱུར། །སངས་རྒྱས་ཡོན་ཏན་ཕུང་པོ་སྐྱེ་བའི་ཡུལ། །ཡོན་ཏན་ཐམས་ཅད་འབྱུང་བའི་གནས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ལྷ་ཡི་རྫུ་འཕྲུལ་ཡབ། །རྫུ་འཕྲུལ་འགྲོས་ཞེས་བྱ་བ་རྒྱལ་བའི་ཡུམ། །སྲས་པོ་རྣམ་སྒྲོགས་དྲག་ཤུལ་རིམ་གྲོ་པ། །ཡོན་ཏན་ཚོགས་ཞེས་བྱ་བ་མཁས་པ་སྟེ། །ཡོན་ཏན་སྒྲོན་མའི་མཆོག་ནི་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་དྲུག་ཀུན་ལའང་། །སྲིད་གསུམ་འདམ་གྱིས་གོས་པ་མེད་པ་པོ། །བྱེ་བ་ཕྲག་ནི་དགུ་བཅུ་བཞི་བཞི་ཡོད། །མི་ཚེ་ལོ་གྲངས་བདུན་ཁྲི་བརྒྱད་སྟོང་ཡིན། །རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲི་བརྒྱད་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །བཅུ་གཉིས་པ་གཅིག་ལྷ་རྫས་བླ་རེར་ལྡན། །འཇིག་རྟེན་བླ་མ་གསལ་བ་སྐྱེ་བའི་ཡུལ། །འཇིགས་པ་མེད་པའི་བསོད་ནམས་ཞེས་ཀྱང་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །སུམ་ཅུ་རྩ་གཉིས་གྲགས་པའི་དབང་པོ་ཡབ། །ལྷ་གྲགས་འཛིན་ཅེས་བྱ་བ་རྒྱལ་བའི་ཡུམ། །སྲས་པོ་གྲགས་འཛིན་ཟླ་སྡུག་རིམ་གྲོ་པ།