།གདངས་སྙན་མ་ཞེས་བྱ་བ་རྒྱལ་བའི་ཡུམ། །སྲས་པོ་ལེགས་མཐོང་དགའ་སྦྱངས་རིམ་གྲོ་པ། །ཡོན་ཏན་ངེས་ཞེས་བྱ་བ་མཁས་པ་སྟེ། །ཆོས་ངེས་པ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །དགྲ་བཅོམ་ཐམས་ཅད་ཆགས་པ་མེད་གྱུར་པ། །བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་བདུན་ཁྲི་བཞི་སྟོང་ཡིན། །མཐའ་ཡས་འདུལ་བར་མཛད་པའི་དམ་ཆོས་དག །ལོ་གྲངས་ཉི་ཁྲི་སུམ་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་དྲུག་པ་ཁོར་ཡུག་བླ་རེར་ལྡན། །དེ་བཞིན་གཤེགས་པ་སྤྱན་སྡུག་པ་ཡི་ཞལ། །སྐྱེ་བའི་ཡུལ་ནི་མཐོང་བས་མཆོད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་སྤྱན་ལེགས་ཡིན། །མིག་སྦྱིན་མ་ཞེས་བྱ་བ་རྒྱལ་བའི་ཡུམ། །སྲས་པོ་འཇིག་རྟེན་ཆགས་མེད་རིམ་གྲོ་པ། །ཡོན་ཏན་མཐོང་ཞེས་བྱ་བ་མཁས་པ་སྟེ། །འཇིགས་པ་མེད་པར་གྲགས་པ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་ཀུན་ལ་ཡང་། །ཐེག་པ་མཆོག་གིས་ལེགས་གནས་འབྲས་ཐོབ་པ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་ཚེ་ལོ་གྲངས་བརྒྱད་ཁྲི་བཞི་སྟོང་ཡིན། །འགོག་པར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ཏེ། །ཞིང་གྲངས་སྟོང་སྙེད་དག་ཏུ་གང་བར་འགྱུར། །དེ་བཞིན་གཤེགས་པ་ཡེ་ཤེས་བཟང་ལྡན་གྱི། །སྐྱེ་ཡུལ་ཡེ་ཤེས་སྒྲོན་མ་ཞེས་ཀྱང་བྱ། །དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བདུན་ཅུ་ཡེ་ཤེས་སྐར་མདའ་ཡབ། །ཡེ་ཤེས་དབང་ཕྱུག་མ་ནི་རྒྱལ་བའི་ཡུམ། །སྲས་པོ་ཤེས་དགའ་ཤེས་འབྱོར་རིམ་གྲོ་པ། །ཡེ་ཤེས་འབྱུང་གནས་ཞེས་བྱ་མཁས་པ་སྟེ། །ཡེ་ཤེས་རྣམ་པར་འཕྲུལ་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཁོར་ཡུག་ལྟ་བུར་གཡོ་བ་མེད་པ་པོ། །བྱེ་བ་ཕྲག་ནི་དགུ་བཅུ་བཞི་བཞི་ཡོད། །མི་ཚེ་ལོ་གྲངས་དག་ནི་དགུ་ཁྲི་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་བདུན་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ།