།འོད་ཀྱི་ཁ་དོག་ཅན་ནི་རྒྱལ་བའི་ཡུམ། །རིན་ཆེན་མཆོག་སྲས་ཤེས་ལྡན་རིམ་གྲོ་པ། །སྤོབས་པའི་དབྱངས་ནི་བློ་གྲོས་ཅན་ཡིན་ཏེ། །ཤེས་རབ་རྣམ་པར་འཕྲུལ་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཆགས་དང་བྲལ་བར་གྱུར་པའི་བསམ་གཏན་པ། །བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །ཡོན་ཏན་མངོན་དགྱེས་པ་ཡི་དམ་ཆོས་དག །ལོ་གྲངས་ཉི་ཁྲི་ཉིས་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བྱེ་བ་སྟོང་ཕྲག་དྲུག་ཅུ་འབྱུང་། །མི་ཡི་འདྲེན་པ་སྟེགས་ནི་བཟང་པོ་ཡི། །སྐྱེ་ཡུལ་འཕགས་པ་དད་པར་བྱེད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་རྩ་གསུམ་ཡབ་ནི་དོན་ཆེན་ཡིན། །བདུད་རྩིའི་ང་རོ་ཞེས་བྱ་རྒྱལ་བའི་ཡུམ། །སྲས་པོ་ཞི་བ་ཉེར་ཞི་རིམ་གྲོ་པ། །ཡོན་ཏན་ཚོགས་ཞེས་བྱ་བ་མཁས་པ་སྟེ། །མཐུ་རྩལ་མཐའ་ཡས་པ་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །འཇིག་རྟེན་བདེ་དང་ཕན་ཕྱིར་གནས་པ་པོ། །བྱེ་བ་ཕྲག་ནི་ཉི་ཤུ་བཞི་བཞི་ཡོད། །མི་ཚེ་ལོ་གྲངས་སུམ་ཁྲི་ཉིས་སྟོང་ཡིན། །དམ་ཆོས་ལོ་གྲངས་སུམ་ཁྲི་དྲུག་སྟོང་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ལ། །དཔག་ཚད་བཅུ་གསུམ་པ་སྟེ་གསེར་གྱིས་སྤྲས། །རྒྱལ་མཚན་བྱེ་བ་སྟོང་གིས་མཛེས་པར་བྱས། །ཡོན་ཏན་རྒྱ་མཚོ་ཚོགས་ཀྱི་དབང་པོ་ཡི། །སྐྱེ་བའི་ཡུལ་ནི་དབང་པོས་བརྒྱན་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་གཅིག་དགའ་བའི་དབང་པོ་ཡབ། །ཚོགས་ཅན་སྤོང་ནི་རྒྱལ་ཡུམ་སྲས་པོ་ནི། །འཕགས་པ་དད་བྱེད་དེས་པ་རིམ་གྲོ་པ། །ཐར་པ་དགའ་ཞེས་བྱ་བ་མཁས་པ་སྟེ། །བདེན་ལ་དད་པར་བྱེད་པ་རྫུ་འཕྲུལ་ཅན། །འདུས་པ་ལན་གྲངས་བཅུ་དྲུག་ཀུན་ལ་ཡང་། །མི་སློབ་འབྲས་བུ་དག་ནི་ཐོབ་པ་པོ། །འབུམ་ཕྲག་ཉི་ཤུ་བཞི་བཞི་འདུས་པར་འགྱུར། །མི་ཚེ་ལོ་གྲངས་སྟོང་ཕྲག་བཅྭ་བརྒྱད་ཡིན། །དམ་ཆོས་ལོ་གྲངས་སྟོང་ཕྲག་བཅྭ་བརྒྱད་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་དགུ་པ་མུ་ཏིག་བླ་རེར་ལྡན། །གསེར་གྱི་རྒྱལ་མཚན་སྟོང་གིས་འཁོར་བར་བསྐོར། །དེ་བཞིན་གཤེགས་པ་བསྙེངས་དང་བྲལ་བ་ཡི།