།འཇིག་རྟེན་སྣང་བར་བྱེད་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཐམས་ཅད་ཆགས་མེད་གྱུར་པ་བསམ་གཏན་པ། །བྱེ་བ་ཕྲག་ནི་ཉི་ཤུ་བཞི་བཞི་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །སྣང་བ་མེད་པར་ཕྱིན་པའི་དམ་ཆོས་དག །ལོ་གྲངས་ཉི་ཁྲི་བཞི་སྟོང་བར་དུ་གནས། །འགྲོ་བའི་དོན་དུ་རྒྱལ་བའི་སྐུ་གདུང་དག །འཇིག་རྟེན་གསུམ་ཀུན་རྒྱས་ཤིང་གང་བར་འགྱུར། །རྡུལ་དང་བྲལ་བའི་པད་མའི་མཛོད་སྐྱེ་བའི། །ཡུལ་ནི་པད་མའི་ཕུང་པོ་ཞེས་ཀྱང་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །བདུན་ཅུ་རྩ་དྲུག་ཡབ་ནི་པད་མ་བཟང་། །པད་དཔལ་མ་ནི་རྒྱལ་ཡུམ་སྲས་པོ་ནི། །སྙིང་རྗེ་ཆེན་པོ་ཐོག་ནི་རིམ་གྲོ་པ། །ཡོན་ཏན་མེ་ཏོག་འཛིན་པ་བློ་ཅན་ཏེ། །མཆོག་སྲེད་ཅེས་ནི་བྱ་བ་རྫུ་འཕྲུལ་ཅན། །འདུས་པ་ལན་གྲངས་བཅུ་གསུམ་ཀུན་ལ་ཡང་། །ཆ་གཉིས་དག་ལས་རྣམ་གྲོལ་དགྲ་བཅོམ་མཆོག །བྱེ་བ་ཕྲག་ནི་ཉི་ཤུ་བཞི་བཞི་ཡོད། །མི་ཚེ་ལོ་གྲངས་དྲུག་ཁྲི་དྲུག་སྟོང་ཡིན། །དམ་ཆོས་ལོ་གྲངས་ཉི་ཁྲི་བཞི་སྟོང་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བྱེ་བ་སྟོང་ཕྲག་བཅུ་དྲུག་སྟེ། །མཆོད་རྟེན་དེ་ཀུན་རིན་ཆེན་བདུན་ལས་བྱས། །འཇིག་རྟེན་མཆོག་མ་འོད་ཟེར་བཟང་པོ་ཡི། །སྐྱེ་ཡུལ་འོད་ཟེར་སྣང་བར་བྱེད་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་བཞི་འོད་ཟེར་ཆེན་པོ་ཡབ། །དགའ་བ་གྲགས་འཛིན་མ་ནི་རྒྱལ་བའི་ཡུམ། །སྲས་པོ་པད་མ་ལེགས་མཐོང་རིམ་གྲོ་པ། །ཆགས་པ་མེད་པའི་སྒྲ་ནི་བློ་ཅན་ཏེ། །གླེང་བའི་ང་རོ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་ཀུན་ལ་ཡང་། །མེ་འོད་འཕྲོ་བ་ལྟར་ནི་ཆགས་མེད་པ། །བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་ཉི་ཁྲི་ལྔ་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བརྒྱ་པ་གསེར་གྱི་འོད་དང་ལྡན། །དེ་བཞིན་གཤེགས་པ་སྤོབས་པའི་མདོག་དག་གི། །སྐྱེ་བའི་ཡུལ་ནི་སྤོབས་པའི་མདོག་ཅེས་བྱ། །རྒྱལ་བ་དེ་ཡི་རིགས་ནི་བྲམ་ཟེ་ཡིན། །འོད་ནི་མཐའ་ཡས་བདག་ཉིད་ཆེན་པོ་ཡབ། །འོད་ཀྱི་ཁ་དོག་ཅན་ནི་རྒྱལ་བའི་ཡུམ།