།མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །མྱ་ངན་འདས་ནས་དམ་པའི་ཆོས་དག་ཀྱང་། །ལོ་གྲངས་ཉི་ཁྲི་དྲུག་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །གསེར་གྱི་བླ་རེ་རྒྱལ་མཚན་དག་གིས་བསྐོར། །འཇིག་རྟེན་མཆོག་མ་ཞི་དོན་སྐྱེ་བའི་ཡུལ། །རྣམ་པར་གདོན་མི་ཟ་བའི་དོན་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་གཟི་བརྗིད་དབང་པོ་ཡབ། །གཟི་བརྗིད་འོད་ཅེས་བྱ་བ་རྒྱལ་བའི་ཡུམ། །སྲས་པོ་སྟོན་བྱེད་ཡུལ་བཟངས་རིམ་གྲོ་པ། །ཕྱོགས་མཆོད་པ་ཞེས་བྱ་བ་མཁས་པ་སྟེ། །ཡོན་ཏན་ཀུན་གྱི་མཆོག་མ་རྫུ་འཕྲུལ་ཅན། །འདུས་པ་ལན་གྲངས་བརྒྱད་དེ་ཀུན་ལ་ཡང་། །མི་ཁོམ་སྲེད་པའི་དྲ་བ་གཅོད་པ་པོ། །དེ་དག་བྱེ་ཕྲག་བཅུ་བཞི་བཅུ་བཞི་ཡོད། །མི་ཚེ་ལོ་གྲངས་ཉི་ཁྲི་བཞི་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་ཉི་ཁྲི་བཞི་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །སྟོང་གསུམ་འགྲོ་བ་ཐམས་ཅད་དབང་དུ་མཛད། །ཆོས་ཀྱི་དབང་ཕྱུག་སྐྱོན་མེད་སྐྱེ་བ་ཡི། །ཡུལ་ནི་སྐྱོན་རྣམས་རབ་ཏུ་སེལ་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །སུམ་ཅུ་རྩ་གཉིས་ཡབ་ནི་རྒྱ་ཆེན་ཡིན། །ལྷ་མཆོག་མ་ཞེས་བྱ་བ་རྒྱལ་བའི་ཡུམ། །སྲས་པོ་ཁ་སྒྱུར་མཐུ་རྩལ་རིམ་གྲོ་པ། །ཡོན་ཏན་མཆོད་རྟེན་ཞེས་བྱ་མཁས་པ་སྟེ། །བསམ་གཏན་པ་ཡིས་བསྔགས་པ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་དྲུག་ཀུན་ལའང་། །མཚོ་ལྟར་གང་བ་དེ་དང་མཚུངས་པ་པོ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །རྒོལ་བ་ཚར་གཅོད་པ་ཡི་དམ་ཆོས་དག །ལོ་གྲངས་དགུ་ཁྲི་ཉིས་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་གཅིག་པ་བླ་རེ་སྟོང་དང་ལྡན། །བདེ་བར་གཤེགས་པ་བློ་དབྱངས་དགེ་བ་ཡི། །སྐྱེ་ཡུལ་དགེ་བ་སྣང་བར་བྱེད་ཅེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་བློ་བཟངས་ཡིན། །དགེ་འོད་མ་ནི་རྒྱལ་ཡུམ་སྲས་པོ་ནི། །གཟུངས་ཀྱི་དབང་ཕྱུག་རྒྱལ་བའི་རིམ་གྲོ་པ། །ཕྱོགས་མཆོད་པ་ཞེས་བྱ་བ་མཁས་པ་སྟེ། །འཇིག་རྟེན་སྣང་བར་བྱེད་པ་རྫུ་འཕྲུལ་ཅན།