།བྱེ་བརྒྱད་པ་ཡིན་སྙན་ལྡན་རིམ་གྲོ་པ། །གདངས་སྙན་པ་ཞེས་བྱ་བ་མཁས་པ་སྟེ། །བདུད་རྣམས་རྣམ་པར་འཇིག་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཐུབ་པའི་དགྲ་བཅོམ་ཡེ་ཤེས་མཆོག་ལྡན་པ། །ཐེར་འབུམ་ཐེར་འབུམ་དག་ནི་འདུས་པར་འགྱུར། །མི་ཚེ་ལོ་གྲངས་དགུ་ཁྲི་བཞི་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་དགུ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་སྟོང་ཕྲག་སྙེད་ཀྱིས་ཀུན་ཏུ་གང་། །སྐྱེས་བུ་དམ་པ་འོད་བཟང་སྐྱེ་བ་ཡི། །ཡུལ་ནི་འོད་ཀྱིས་ལེགས་པར་བརྒྱན་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་མཐུ་ལྡན་ཡིན། །གཟི་བརྗིད་ཆེན་མོ་ཅན་ནི་རྒྱལ་བའི་ཡུམ། །སྲས་པོ་ཚངས་སྦྱིན་ཡུལ་ས་རིམ་གྲོ་པ། །ཉི་མའི་འོད་ཅེས་བྱ་བ་མཁས་པ་སྟེ། །འཇིགས་པ་མེད་པའི་བློ་ནི་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །ཚངས་པར་སེམས་བཟང་ལྷ་ཡིས་མཆོད་འགྱུར་བ། །བྱེ་བ་ཕྲག་ནི་ཉི་ཤུ་བཞི་བཞི་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་ཉི་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །འཇིག་རྟེན་ཕན་ཕྱིར་རྒྱལ་བས་རྣམ་པར་བཀང་། །འཇིག་རྟེན་མཆོག་མ་ཤིན་ཏུ་ཐུགས་གཞུངས་པའི། །སྐྱེ་བའི་ཡུལ་ནི་བྱང་ཆུབ་ཚོགས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དགུ་ཡོད་ཡབ་ནི་གསལ་བ་ཡིན། །གཟི་བརྗིད་འོད་ལྡན་མ་ནི་རྒྱལ་བའི་ཡུམ། །སྲས་པོ་ཡུལ་སྡུག་ལེགས་མཐོང་རིམ་གྲོ་པ། །མི་སྙོམས་ཏོག་ནི་བློ་གྲོས་ཅན་ཡིན་ཏེ། །འཇིགས་པ་མེད་པའི་བློ་ནི་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་དྲུག་ཀུན་ལའང་། །ཐམས་ཅད་ཟང་ཟིང་མེད་པའི་ཆོས་སྦྱིན་བྱེད། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །དམ་ཆོས་ལོ་གྲངས་བདུན་ཁྲི་དྲུག་སྟོང་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །འཕང་སྲིད་དུ་ནི་དཔག་ཚད་བཞི་འཕགས་ལ། །གསེར་གྱི་རྒྱན་དག་གིས་ནི་འཁོར་བར་བསྐོར། །དེ་བཞིན་གཤེགས་པ་དོན་དགོངས་གཏི་མུག་བྲལ།