།མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་སུམ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་འབུམ་ཕྲག་སྙེད་ཀྱིས་བརྒྱན་པར་འགྱུར། །དེ་བཞིན་གཤེགས་པ་ཡོན་ཏན་གཟི་བརྗིད་དཔལ། །སྐྱེ་ཡུལ་ཡོན་ཏན་ཐམས་ཅད་འབྱུང་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་བཞི་ཡབ་ནི་གཟུགས་བཟང་ཡིན། །གཟི་བརྗིད་འོད་ནི་རྒྱལ་ཡུམ་སྲས་པོ་ནི། །གཟི་བྱིན་ཡོན་ཏན་གཟི་བརྗིད་རིམ་གྲོ་པ། །ཕྱོགས་མཆོད་པ་ཞེས་བྱ་བ་མཁས་པ་སྟེ། །བདུད་རབ་འཇོམས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །དགྲ་བཅོམ་བྱེ་བ་བཅུ་དྲུག་བཅུ་དྲུག་ཡོད། །མི་རྣམས་དག་གི་ཚེ་ཡི་ཚད་དག་ཀྱང་། །ལོ་གྲངས་ཉི་ཁྲི་བདུན་སྟོང་ཐམ་པ་ཡིན། །རྒྱལ་བ་མྱ་ངན་འདས་ནས་དམ་ཆོས་དག །ལོ་གྲངས་སུམ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །པད་མ་འབུམ་ཕྲག་སྙེད་ཀྱིས་བརྒྱན་པར་འགྱུར། །དེ་བཞིན་གཤེགས་པ་མཁྱེན་ལྡན་ཟླ་མེད་པ། །སྐྱེ་ཡུལ་ཤེས་ལྡན་སྣང་བར་བྱེད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །བདུན་ཅུ་རྩ་གསུམ་མཆོད་སྦྱིན་བཟང་པོ་ཡབ། །ཡེ་ཤེས་ཅན་ནི་རྒྱལ་ཡུམ་ཤེས་ལྡན་བྱིན། །སྲས་ཡིན་ལེགས་པའི་མཆོད་སྦྱིན་རིམ་གྲོ་པ། །ཡེ་ཤེས་དབང་ཕྱུག་ཅེས་བྱ་མཁས་པ་སྟེ། །ཆགས་མེད་རྣམ་པར་གྲོལ་བ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་གཉིས་ཀུན་ལའང་། །སྲེད་ཕྱོགས་དྲི་མ་དག་དང་བྲལ་བ་པོ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་དག་ནི་སྟོང་ཡང་ཡིན། །དམ་ཆོས་ལོ་གྲངས་བདུན་ཁྲི་དྲུག་སྟོང་གནས། །རྒྱལ་བའི་སྐུ་གདུང་མཆོད་རྟེན་དཔག་ཚད་གྲངས། །བཅུ་གསུམ་པ་སྟེ་གཅིག་ཅིག་འབྱུང་འགྱུར་ལ། །གསེར་གྱི་བླ་རེ་བརྒྱ་ཕྲག་སྙེད་ཀྱིས་བརྒྱན། །དེ་བཞིན་གཤེགས་པ་ང་རོ་དཔག་མེད་ཀྱི། །སྐྱེ་བའི་ཡུལ་ནི་རྟ་སྐད་དབྱངས་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་ཉི་ཤུ་ཡབ་ནི་དབྱངས་སྙན་ཡིན། །ཤེས་ལྡན་དབྱངས་ནི་ཡུམ་ཡིན་སྲས་པོ་ནི། །བྱེ་བརྒྱད་པ་ཡིན་སྙན་ལྡན་རིམ་གྲོ་པ།