།འཇིག་རྟེན་ཟང་ཟིང་མེད་པའི་དགྲ་བཅོམ་པ། །བྱེ་བ་ཕྲག་ནི་ཉི་ཤུ་གསུམ་གསུམ་ཡོད། །མི་ཚེ་ལོ་གྲངས་ཉི་ཁྲི་སུམ་སྟོང་ཡིན། །དམ་ཆོས་ལོ་གྲངས་སུམ་ཁྲི་ཆིག་སྟོང་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བཞི་པ་རིན་ཆེན་ཕལ་པོ་ཆེའི། །དྲ་བས་སྤྲས་པས་འོད་ནི་མཐའ་ཡང་ཡས། །དེ་བཞིན་གཤེགས་པ་ཡེ་ཤེས་རྒྱ་མཚོ་ཡི། །སྐྱེ་བའི་ཡུལ་ནི་ཡེ་ཤེས་ཚོགས་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །སུམ་ཅུ་རྩ་གསུམ་ཡབ་ནི་ཡོན་ཏན་ཡིན། །དོན་འདོད་མ་ཞེས་བྱ་བ་རྒྱལ་བའི་ཡུམ། །སྲས་པོ་ལེགས་གཞི་ཟླ་དབང་རིམ་གྲོ་པ། །མཆོད་རྟེན་ཤིང་རྟ་ཞེས་བྱ་མཁས་པ་སྟེ། །འཇིགས་མེད་ཡེ་ཤེས་ལྡན་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །སྲེད་པའི་རྒྱ་མཚོ་རྣམ་པར་སྐེམས་པ་པོ། །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །མི་ཚེ་ལོ་གྲངས་དགུ་ཁྲི་ཉིས་སྟོང་ཡིན། །རྒྱལ་བ་མྱ་ངན་འདས་ནས་དམ་ཆོས་དག །འོན་ཀྱང་ལོ་གྲངས་སྟོང་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །ཞིང་རྣམས་ཀུན་ཏུ་འོད་ནི་མཐའ་ཡང་ཡས། །ཆོས་ཀྱི་དབང་ཕྱུག་རི་ཡི་དབང་པོ་ཡི། །སྐྱེ་བའི་ཡུལ་ནི་མཛེས་པར་སྤྲས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་ལྷ་བཟང་ཡིན། །ལྷ་ཡི་དབང་ཕྱུག་མ་ནི་རྒྱལ་བའི་ཡུམ། །སྲས་པོ་ཙན་དན་སྤོས་བཟངས་རིམ་གྲོ་པ། །རིན་ཆེན་འགྲོས་ཞེས་བྱ་བ་མཁས་པ་སྟེ། །ཆོས་ལ་རྣམ་པར་ལྟ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །དགྲ་བཅོམ་ཐམས་ཅད་ཆགས་པ་མེད་གྱུར་པ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་སུམ་སྟོང་ཡིན། །འགྲོ་ལ་ཕན་ཕྱིར་དམ་པའི་ཆོས་དག་ཀྱང་། །ལོ་གྲངས་སུམ་ཁྲི་བཞི་སྟོང་བར་དུ་གནས། །སྐུ་གདུང་རྒྱས་འགྱུར་མཆོད་རྟེན་དམ་པའི་གྲངས། །བྱེ་བ་སྟོང་ཕྲག་ཉི་ཤུ་རྩ་གཉིས་འབྱུང་། །མི་ཡི་མགོན་པོ་རབ་ཏུ་ཞི་བ་ཡི། །སྐྱེ་བའི་ཡུལ་ནི་གྲགས་པར་སྣང་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཤིན་ཏུ་ཞི་བ་ཡབ། །ཞི་གནས་དགའ་ཞེས་བྱ་བ་རྒྱལ་བའི་ཡུམ། །སྲས་པོ་ཞི་བྱིན་ཞི་དབང་རིམ་གྲོ་པ།