།མཆོད་རྟེན་གྲངས་ནི་ཐེར་འབུམ་དགུ་བཅུ་ཡོད། །འཇིག་རྟེན་མགོན་པོ་མེ་ཏོག་རྒྱས་པ་ཡི། །སྐྱེ་ཡུལ་མེ་ཏོག་རྒྱས་པས་བརྒྱན་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་ངོས་བཟངས་ཡིན། །མེ་ཏོག་ཤིང་རྟ་རྒྱལ་ཡུམ་མེ་ཏོག་ནི། །སྲས་ཡིན་མེ་ཏོག་བཟང་པོ་རིམ་གྲོ་པ། །ཡོན་ཏན་མེ་ཏོག་འཆང་བ་བློ་ཅན་ཏེ། །མེ་ཏོག་བསགས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །རྣམ་ཐར་མཆོག་དང་རྣམ་པར་གྲགས་ཐོབ་པ། །བྱེ་བ་ཕྲག་ནི་བདུན་ཅུ་ལྔ་ལྔ་ཡོད། །མི་ཚེ་ལོ་གྲངས་སུམ་ཁྲི་དྲུག་སྟོང་ཡིན། །མྱ་ངན་འདས་ནས་དེ་ཡི་དམ་ཆོས་དག །ལོ་གྲངས་ཉི་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་འཕང་དུ། །དཔག་ཚད་གཅིག་པ་ལེགས་སྤྲས་མཐའ་ཡང་ཡས། །དེ་བཞིན་གཤེགས་པ་མཐུ་རྩལ་སྟབས་སྐྱེ་བའི། །ཡུལ་ནི་བསོད་ནམས་ཤིན་ཏུ་རྩལ་དང་ལྡན། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་མཐུ་རྩལ་ཅན། །འགྲོས་སྙོམས་པ་ནི་རྒྱལ་ཡུམ་མཐུ་རྩལ་ཅན། །སྲས་ཡིན་ཉམས་རྩལ་ཆེན་པོ་རིམ་གྲོ་པ། །དགའ་བའི་མཐུ་རྩལ་ཅན་ནི་མཁས་པ་སྟེ། །རྣམ་པར་གནོན་པའི་རྒྱལ་པོ་རྫུ་འཕྲུལ་ཅན། །འདུས་པ་ལན་གྲངས་བཅྭ་བརྒྱད་ཀུན་ལ་ཡང་། །འཇིག་རྟེན་བདེ་དང་ཕན་ཕྱིར་གནས་པ་པོ། །བྱེ་བ་ཕྲག་ནི་དགུ་བཅུ་རེ་རེ་ཡོད། །མི་ཚེ་ལོ་གྲངས་སུམ་ཁྲི་དྲུག་སྟོང་ཡིན། །འདྲེན་པ་མྱ་ངན་འདས་ནས་དམ་ཆོས་དག །ལོ་གྲངས་སུམ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །འཇིག་རྟེན་དག་གིས་མཆོད་ཅིང་བཀུར་བར་འགྱུར། །དེ་བཞིན་གཤེགས་པ་བསོད་ནམས་ཕུང་པོ་ཡི། །སྐྱེ་བའི་ཡུལ་ནི་བསོད་ནམས་འོད་ཅེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་བསོད་ནམས་བཟང་པོ་ཡབ། །བསོད་ནམས་འོད་ཅེས་བྱ་བ་རྒྱལ་བའི་ཡུམ། །སྲས་པོ་ལེགས་དགའ་མཐུ་ལྡན་རིམ་གྲོ་པ། །ནོར་ལ་དགའ་ཞེས་བྱ་བ་མཁས་པ་སྟེ། །སེམས་ཅན་མཆོག་ཅེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཡེ་ཤེས་དགའ་བ་བྱང་ཆུབ་གཞོལ་བ་པོ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད།