།བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་དྲུག་ཁྲི་བཞི་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བཞི་པ་རྒྱལ་མཚན་དག་གིས་བསྐོར། །དེ་བཞིན་གཤེགས་པ་གཟུགས་མཆོག་སྐྱེ་བ་ཡི། །ཡུལ་ནི་ལེགས་པར་བསམ་པ་སེམས་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་གཟུགས་བཟང་ཡིན། །གཟུགས་ལྡན་མ་ཞེས་བྱ་བ་རྒྱལ་བའི་ཡུམ། །སྲས་པོ་སྡུ་གུ་མཛེས་པ་རིམ་གྲོ་པ། །ཡོན་ཏན་གཟུགས་ལྡན་པ་ནི་མཁས་པ་སྟེ། །གཟུགས་ལ་རྣམ་པར་ལྟ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་དྲུག་ཀུན་ལའང་། །ལས་དང་ཉོན་མོངས་སྲིད་དང་བྲལ་བ་པོ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་དག་ནི་བདུན་ཁྲི་ཡིན། །འཇིག་རྟེན་མཁྱེན་པའི་དམ་པའི་ཆོས་དག་ཀྱང་། །ལོ་གྲངས་སུམ་ཁྲིའི་བར་དུ་གནས་པར་འགྱུར། །འཇིག་རྟེན་མཁྱེན་པ་མྱ་ངན་འདས་ནས་ཀྱང་། །འཇིག་རྟེན་གསུམ་ཀུན་སྐུ་གདུང་རྒྱས་པར་འགྱུར། །མི་ཡི་འདྲེན་པ་སྐར་མཁན་སྐྱེ་བ་ཡི། །ཡུལ་ནི་གཟི་བརྗིད་འོད་དང་ལྡན་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །སུམ་ཅུ་རྩ་གཉིས་ཡབ་ནི་ལེགས་སྣང་ཡིན། །གསལ་མཆོག་མ་ཞེས་བྱ་བ་རྒྱལ་བའི་ཡུམ། །གླང་པོ་སྲས་ཡིན་གྲགས་པ་རིམ་གྲོ་པ། །ཆོ་ག་བཟང་ཞེས་སྣང་ནི་བློ་ཅན་ཏེ། །སྐར་མཁན་རྒྱལ་པོ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །ཉོན་མོངས་རྒྱགས་པ་ཐམས་ཅད་ཞི་གྱུར་པ། །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །མི་ཚེ་ལོ་གྲངས་དག་ནི་དགུ་ཁྲི་ཡིན། །ཞི་བར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་ཉི་ཁྲི་ཉིས་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །ཀུན་ཀྱང་པད་མ་བླ་རེས་མཛེས་པར་བྱས། །དེ་བཞིན་གཤེགས་པ་ཟླ་བའི་སྒྲོན་མ་ཡི། །སྐྱེ་བའི་ཡུལ་ནི་ཉི་མའི་སྒྲོན་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་དཔག་ཚད། །དྲུག་ཅུ་རྩ་གསུམ་ཡབ་ནི་ཏོག་བཟངས་ཡིན། །འོད་རྒྱལ་མ་ཞེས་བྱ་བ་རྒྱལ་བའི་ཡུམ། །སྲས་པོ་གཟི་བཟང་དགའ་བ་རིམ་གྲོ་པ། །