།རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་ལྔ་ཡོད་ཡབ་ནི་ཟླ་བཟང་ཡིན། །འོད་ཟེར་མཆོག་ཅེས་བྱ་བ་རྒྱལ་བའི་ཡུམ། །སྲས་པོ་བཟང་ལྡན་ཟླ་བ་རིམ་གྲོ་པ། །ཟླ་ཉིའི་འོད་ཅེས་བྱ་བ་མཁས་པ་སྟེ། །སྐར་མཁན་རྒྱལ་པོ་ཞེས་བྱ་རྫུ་འཕྲུལ་ཅན། །འདུས་པ་དག་ནི་ལན་གྲངས་བདུན་ཅུ་ལ། །དབང་པོ་ཐོབ་པའི་ཚོགས་དག་འདུས་འགྱུར་ཏེ། །འབུམ་ཕྲག་བརྒྱད་ཅུ་རྩ་གསུམ་སྙེད་གཅིག་འབྱུང་། །མི་ཚེ་ལོ་གྲངས་དག་ནི་དགུ་ཁྲི་ཡིན། །སྟོན་པ་མྱ་ངན་འདས་ནས་དམ་ཆོས་དག །ལོ་གྲངས་དགུ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །རིན་ཆེན་ལྷ་ཡི་གཞལ་མེད་ཁང་པར་ལྡན། །དེ་བཞིན་གཤེགས་པ་ཡེ་ཤེས་དཔའ་བོ་ཡི། །སྐྱེ་བའི་ཡུལ་ནི་ས་ཡི་མཆོད་རྟེན་ཡིན། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་རྩ་གཅིག་ཡབ་ནི་དོན་བྱས་ཡིན། །མཐུ་རྩལ་བློ་གྲོས་མ་ནི་རྒྱལ་བའི་ཡུམ། །སྲས་པོ་ཆོས་ཅན་ཆོས་བཟངས་རིམ་གྲོ་པ། །མི་དབང་བློ་གྲོས་ཞེས་བྱ་བློ་ཅན་ཏེ། །འཁྲུགས་པ་མེད་པར་གནས་པ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་ཀུན་ལ་ཡང་། །ཐར་པར་གཞོལ་བ་ཞི་བ་ཐོབ་པ་པོ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་དགུ་ཁྲི་སུམ་སྟོང་ཡིན། །འགོག་པར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་ལྔ་པ་བཀོད་པས་རྣམ་པར་སྤྲས། །དེ་བཞིན་གཤེགས་པ་པད་མའི་ཕུང་པོ་ཡི། །སྐྱེ་བའི་ཡུལ་ནི་བསོད་ནམས་སྣང་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་པད་མ་ཡིན། །རིན་ཆེན་མེ་ཏོག་ཅེས་བྱ་རྒྱལ་བའི་ཡུམ། །སྲས་པོ་པད་ལྡན་པད་དཀར་རིམ་གྲོ་པ། །ངེས་པར་བྱས་ཞེས་བྱ་བ་མཁས་པ་སྟེ། །ཁ་ལོ་སྒྱུར་བའི་རྒྱལ་པོ་རྫུ་འཕྲུལ་ཅན། །འདུས་པ་ལན་གྲངས་བཅུ་གཅིག་ཀུན་ལ་ཡང་། །བདུད་ཀྱི་ཕྱོགས་རྣམས་རབ་ཏུ་བཅོམ་པ་པོ། །བྱེ་བ་ཕྲག་ནི་ཁྲི་ཕྲག་གསུམ་གསུམ་ཡོད། །མི་ཚེ་ལོ་གྲངས་སུམ་ཁྲི་བཞི་སྟོང་ཡིན། །གྲགས་པ་མཐའ་ཡས་པ་ཡི་དམ་ཆོས་དག །ལོ་གྲངས་འབུམ་གྱི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་གྲངས་ནི་ཐེར་འབུམ་དགུ་བཅུ་ཡོད།