།འགྲོས་མཛེས་མ་ཞེས་བྱ་བ་རྒྱལ་བའི་ཡུམ། །སྲས་པོ་འགྲོས་ལྡན་ལྷ་ལེགས་རིམ་གྲོ་པ། །སྤོབས་པ་འཆང་ཞེས་བྱ་བ་བློ་ཅན་ཏེ། །སྐྱེས་རབས་ཁ་ལོ་སྒྱུར་བ་རྫུ་འཕྲུལ་ཅན། །འདུས་པ་ལན་གྲངས་བཅུ་སྟེ་ཀུན་ལ་ཡང་། །ཐམས་ཅད་ཆགས་པ་མེད་པར་གྱུར་པ་པོ། །བྱེ་ཕྲག་བདུན་ཅུ་གཉིས་གཉིས་འདུས་པར་འགྱུར། །མི་ཚེ་ལོ་གྲངས་དག་ནི་དགུ་ཁྲི་ཡིན། །མྱ་ངན་འདས་པར་ཕྱིན་པའི་དམ་ཆོས་དག །ལོ་གྲངས་ཉིས་སྟོང་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་ལྔ་པ་གསེར་ལས་བྱས་པ་ཡིན། །མགོན་པོ་ཐོགས་མེད་བློ་ནི་སྐྱེ་བའི་ཡུལ། །འཇིག་རྟེན་དག་གིས་འདུལ་བར་དཀའ་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་གཉིས་ཡབ་ནི་གདུལ་དཀའ་ཡིན། །མཆོད་རྟེན་གྲགས་པ་རྒྱལ་ཡུམ་མཆོད་སྦྱིན་བྱིན། །སྲས་ཡིན་མཆོད་སྦྱིན་བཟང་པོ་རིམ་གྲོ་པ། །གླེང་བ་པོ་ལ་དགའ་བ་མཁས་པ་སྟེ། །མཆོག་གི་རྒྱལ་པོ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་བཅུ་གཅིག་ཀུན་ལ་ཡང་། །རི་ལྟར་མི་སྒུལ་ལུས་ནི་སྦྱངས་པ་པོ། །བྱེ་བ་ཕྲག་ནི་བདུན་ཅུ་གཉིས་གཉིས་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །མི་ཡི་སློབ་དཔོན་རྒྱལ་བའི་དམ་ཆོས་དག །ལོ་གྲངས་དགུ་སྟོང་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །རིན་ཆེན་འབུམ་ཕྲག་སྙེད་ནི་འབར་བར་འགྱུར། །དེ་བཞིན་གཤེགས་པ་སྒྲ་གཅན་ལྷ་དག་གི། །སྐྱེ་བའི་ཡུལ་ནི་ཆུ་ལྷས་མཆོད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །དགུ་བཅུ་རྩ་གཉིས་ཡབ་ནི་ལྷ་བཟང་ཡིན། །ལྷ་མ་ཡིན་གྱི་བདག་མོ་རྒྱལ་ཡུམ་སྲས། །རིན་ཆེན་རིན་ཆེན་བཟང་པོ་རིམ་གྲོ་པ། །དགའ་བས་མཆོད་ཅེས་བྱ་བ་བློ་ཅན་ཏེ། །རྣལ་འབྱོར་ངག་ལ་དད་བྱེད་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །དྲི་གསུམ་དྲི་མ་གཅོད་པར་བྱེད་པ་པོ། །ཐེར་འབུམ་ཕྲག་ནི་དྲུག་དྲུག་འདུས་པར་འགྱུར། །མི་ཚེ་ལོ་གྲངས་བདུན་ཁྲི་བཞི་སྟོང་ཡིན། །ཡོན་ཏན་མཆོག་ཏུ་ཕྱིན་པའི་དམ་ཆོས་དག །ལོ་གྲངས་བདུན་ཁྲི་བཞི་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །བཅུ་དྲུག་པ་གཅིག་གསེར་གྱིས་སྤྲ་བར་བྱས།