།སྲེད་མེད་མ་རིག་པ་དང་བྲལ་བ་པོ། །བྱེ་བ་ཕྲག་ནི་སུམ་ཅུ་ལྔ་ལྔ་ཡོད། །མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །འཇིག་རྟེན་མཁྱེན་པའི་དམ་པའི་ཆོས་དག་ཀྱང་། །ལོ་གྲངས་སུམ་ཁྲི་ལྔ་སྟོང་བར་དུ་གནས། །མཆོད་རྟེན་བཟང་པོ་དགུ་ཁྲི་ཉིས་སྟོང་སྟེ། །རྒྱལ་མཚན་དམ་པ་དག་གིས་རྒྱས་པར་འགྱུར། །དེ་བཞིན་གཤེགས་པ་དྲག་ཤུལ་སྡེ་སྐྱེ་བའི། །ཡུལ་ནི་དྲག་ཤུལ་ལྡན་པ་ཞེས་ཀྱང་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་ཡུལ་འཁོར་བཟང་། །དམན་པ་མིན་ཞེས་བྱ་བ་རྡུལ་བྲལ་ཡུམ། །སྲས་པོ་མཛོད་སྤུ་རྫོགས་ལྡན་རིམ་གྲོ་པ། །ཡོན་ཏན་རྫོགས་ཞེས་བྱ་བ་མཁས་པ་སྟེ། །ཆོས་ལ་རྣམ་པར་ངེས་པ་རྫུ་འཕྲུལ་ཅན། །འདུས་པ་ལན་གྲངས་བདུན་ཏེ་ཀུན་ལ་ཡང་། །ཡིད་བཞིན་གྲུབ་པ་དང་ནི་འདྲ་བ་པོ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་དག་ནི་ཁྲི་ཡང་ཡིན། །འགོག་པར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་དགུ་སྟོང་ཚང་བར་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་གསུམ་པ་སྟེ། །མེ་ཡི་ཕུང་པོ་ལྟ་བུར་འབར་ཞིང་སྤ། །དེ་བཞིན་གཤེགས་པ་བསོད་ནམས་གཟི་བརྗིད་ཀྱི། །སྐྱེ་བའི་ཡུལ་ནི་བསོད་ནམས་བརྒྱན་ཅེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་དགུ་ཡོད་ཡབ་ནི་ཏོག་བཟངས་ཡིན། །ཏོག་གི་བློ་གྲོས་མ་ནི་རྒྱལ་བའི་ཡུམ། །སྲས་པོ་སྐར་མཁན་ལེགས་སྐྱེས་རིམ་གྲོ་པ། །མཐུ་རྩལ་བརྒྱ་པ་ཞེས་བྱ་མཁས་པ་སྟེ། །ཐེ་ཚོམ་སེལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་དྲུག་ཀུན་ལའང་། །དགྲ་བཅོམ་འཕགས་པའི་ཆོས་ནི་ཐོབ་པ་པོ། །སྲིད་པའི་ཕ་མཐར་ཕྱིན་པ་ཤ་སྟག་གོ། །མི་ཚེ་ལོ་གྲངས་ལྔ་ཁྲི་དྲུག་སྟོང་ཡིན། །རྡུལ་དང་བྲལ་བའི་དམ་པའི་ཆོས་དག་ཀྱང་། །ལོ་གྲངས་བྱེ་བའི་བར་དུ་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་གསུམ་པ་སྟེ། །གསེར་གྱི་རྒྱལ་མཚན་མཆོག་སྟོང་སྙེད་ཀྱིས་བརྒྱན། །བདེ་གཤེགས་མཐུ་རྩལ་ཅན་ནི་སྐྱེ་བའི་ཡུལ། །རྣམ་པར་རྒྱལ་བའི་གཟི་བརྗིད་ཅེས་ཀྱང་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དྲུག་ཡོད་ཡབ་ནི་ཤིན་ཏུ་མཛེས། །འགྲོས་མཛེས་མ་ཞེས་བྱ་བ་རྒྱལ་བའི་ཡུམ།