།ལོ་གྲངས་བདུན་ཁྲི་བརྒྱད་སྟོང་བར་དུ་གནས། །འཇིག་རྟེན་མཁྱེན་པའི་མཆོད་རྟེན་དག་གི་གྲངས། །ཐེར་འབུམ་ཕྲག་ནི་བདུན་ཅུ་ཚང་བར་འབྱུང་། །རྐང་གཉིས་མཆོག་མ་དེ་བཞིན་གཤེགས་རྒྱལ་གྱི། །སྐྱེ་བའི་ཡུལ་ནི་ནབས་སོ་ཞེས་ཀྱང་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་རྒྱུ་སྐར་ཡིན། །རྒྱུ་སྐར་བདག་མོ་ཞེས་བྱ་རྒྱལ་བའི་ཡུམ། །སྲས་པོ་དགྲ་འདུལ་ཞི་བ་རིམ་གྲོ་པ། །ཞི་བའི་རྒྱ་མཚོ་ཞེས་བྱ་མཁས་པ་སྟེ། །འཇིགས་པ་མེད་པའི་བློ་ནི་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་དྲུག་ཀུན་ལའང་། །ཐེག་པ་མཆོག་གིས་ཕ་རོལ་ཕྱིན་གྱུར་པ། །བྱེ་བ་ཕྲག་ནི་ཁྲི་ཕྲག་རེ་རེ་ཡོད། །མི་ཚེ་ལོ་གྲངས་བརྒྱད་ཁྲི་དགུ་སྟོང་ཡིན། །འགྲོ་ལ་ཕན་ཕྱིར་དམ་པའི་ཆོས་དག་ཀྱང་། །ལོ་གྲངས་དགུ་ཁྲིའི་བར་དུ་གནས་པར་འགྱུར། །དེ་ཡི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བདུན་པ་གསེར་གྱིས་རྣམ་པར་སྤྲས། །བདེ་བར་གཤེགས་པ་སྤྱན་མཛེས་སྐྱེ་བའི་ཡུལ། །ཉམས་དགའ་མིག་ཏུ་སྡུག་པ་ཞེས་ཀྱང་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་མིག་བཟངས་ཡིན། །མིག་སྡུག་ཅེས་ནི་བྱ་བ་རྒྱལ་བའི་ཡུམ། །སྲས་པོ་དགའ་བྱེད་མིག་ལེགས་རིམ་གྲོ་པ། །བློ་གནས་པ་ཞེས་བྱ་བ་མཁས་པ་སྟེ། །སྨད་པ་མེད་པའི་ལུས་ནི་རྫུ་འཕྲུལ་ཅན། །འདུས་པ་ལན་གྲངས་བཅུ་སྟེ་ཀུན་ལ་ཡང་། །རི་ལྟར་གཡོ་བ་མེད་པར་མཚུངས་པ་པོ། །བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་སྟོང་ཕྲག་བཅུ་བདུན་ཡིན། །རྒྱལ་བ་འགོག་པར་ཕྱིན་པའི་དམ་ཆོས་དག །ལོ་གྲངས་སྟོང་གི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་ཐམས་ཅད་བྱེ་བ་སྟོང་དུ་ཚང་། །དེ་བཞིན་གཤེགས་པ་རྙོག་པ་མེད་པའི་དོན། །སྐྱེ་བའི་ཡུལ་ནི་ནོར་གྱིས་བརྒྱན་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་གསུམ་ཡོད་ཡབ་ནི་གཟུགས་བཟང་ཡིན། །སེམས་མཚུངས་མ་ནི་རྒྱལ་ཡུམ་སྲས་པོ་ནི། །ཁ་ལོ་སྒྱུར་བ་སྣང་ལྡན་རིམ་གྲོ་པ། །འགྲོ་བའི་དབང་ཕྱུག་ཅེས་བྱ་མཁས་པ་སྟེ། །དད་པར་བྱེད་པའི་བློ་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །སྲེད་མེད་མ་རིག་པ་དང་བྲལ་བ་པོ།