།ལྷ་མིའི་དོན་ཕྱིར་དམ་ཆོས་ལོ་སྟོང་དུ། །གནས་འགྱུར་སྐུ་གདུང་བཅས་པའི་མཆོད་རྟེན་ནི། །དཔག་ཚད་དགུ་བཅུ་རྩ་བརྒྱད་པ་གཅིག་སྟེ། །རིན་ཆེན་བརྒྱ་སྙེད་དྲ་བས་རྣམ་པར་སྤྲས། །དེ་བཞིན་གཤེགས་པ་ཡོན་ཏན་ཚོགས་དག་གི། །སྐྱེ་བའི་ཡུལ་ནི་ཡོན་ཏན་བརྒྱན་ཅེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་གསུམ་ཡོད་ཡབ་ནི་རྒལ་བ་པོ། །ཡོན་ཏན་གཟི་བརྗིད་ལྡན་པ་རྒྱལ་བའི་ཡུམ། །སྲས་པོ་བློ་ལྡན་བློ་ཅན་རིམ་གྲོ་པ། །མི་དགའ་སྤོང་ཞེས་བྱ་བ་མཁས་པ་སྟེ། །དྲ་བ་གཅོད་བྱེད་པ་ནི་རྫུ་འཕྲུལ་ཅན། །འདུས་པ་ལན་གྲངས་བཅུ་གཅིག་ཀུན་ལ་ཡང་། །ཆགས་པ་མེད་པ་བསམ་གཏན་པ་དེ་ཀུན། །བྱེ་བ་བརྒྱ་ཕྲག་དག་ནི་གསུམ་གསུམ་ཡོད། །མི་ཚེའི་ཚད་ནི་ལོ་གྲངས་ཁྲི་ཡང་ཡིན། །རྒྱལ་བའི་དམ་ཆོས་ལོ་གྲངས་སྟོང་དུ་གནས། །རྒྱལ་བའི་མཆོད་རྟེན་སྐུ་གདུང་བཅས་པ་ནི། །དཔག་ཚད་ཕྱེད་པའི་མཆོད་རྟེན་གཅིག་ཡིན་ཏེ། །གདུགས་གྲངས་སྟོང་ཕྲག་བདུན་ཅུས་རྣམ་པར་བརྒྱན། །དེ་བཞིན་གཤེགས་པ་རིན་ཆེན་མེ་ཏོག་གི། །སྐྱེ་བའི་ཡུལ་ནི་བློ་ལྡན་མཆོག་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །དྲུག་ཅུ་རྩ་གཉིས་ཚོགས་ཅན་དབང་པོ་ཡབ། །སེང་གེ་རྒྱལ་མཚན་ཞེས་བྱ་རྒྱལ་བའི་ཡུམ། །སྲས་པོ་ཚོགས་ཅན་ཚོགས་བཟང་རིམ་གྲོ་པ། །རི་ལྟར་བརྩེགས་ཞེས་བྱ་བ་བློ་ལྡན་ཏེ། །ཆགས་པ་མེད་པར་གནས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ཕྱིར་མི་ལྡོག་པ་གཟུངས་ནི་ཐོབ་པ་པོ། །བྱེ་བ་ཕྲག་ནི་བདུན་ཅུ་དྲུག་དྲུག་འདུས། །མི་ཚེ་ལོ་གྲངས་དགུ་ཁྲི་དགུ་སྟོང་ཡིན། །ཞི་བར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་སུམ་ཁྲི་ཉིས་སྟོང་བར་དུ་གནས། །སྲིད་པ་ཐར་མཛད་པ་ཡི་མཆོད་རྟེན་གྲངས། །བརྒྱད་ཁྲི་བཞི་སྟོང་དག་ནི་འབྱུང་བར་འགྱུར། །བདེ་བར་གཤེགས་པ་འཇིག་རྟེན་འདས་པ་ཡི། །སྐྱེ་ཡུལ་བསོད་ནམས་ལེགས་པར་བསྒོམས་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །སུམ་ཅུ་རྩ་དྲུག་ཡབ་ནི་མུ་སྟེགས་བཟང་། །དོན་ལ་དགའ་ཞེས་བྱ་བ་རྒྱལ་བའི་ཡུམ། །སྲས་པོ་དོན་ལྡན་དགའ་བ་རིམ་གྲོ་པ། །འཇིགས་མེད་དགའ་ཞེས་བྱ་བ་མཁས་པ་སྟེ།