།གཟི་བརྗིད་མངོན་འཕགས་པ་ནི་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །མཚུངས་མེད་བྱ་དང་མཚུངས་ཤིང་འདྲ་བ་པོ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་ཚེ་ལོ་གྲངས་བདུན་ཁྲི་ཉིས་སྟོང་ཡིན། །འགྲོ་ལ་ཕན་ཕྱིར་དམ་པའི་ཆོས་དག་ཀྱང་། །ལོ་གྲངས་སྟོང་ཕྲག་བཅུ་བཞིའི་བར་དུ་གནས། །མཆོད་རྟེན་བཟང་པོ་བྱེ་བ་བརྒྱ་ཕྲག་བཅུ། །གསེར་གྱི་འོད་དག་གིས་ནི་རྒྱས་པར་འགྱུར། །དེ་བཞིན་གཤེགས་པ་རིན་ཆེན་མཐོན་པོ་ཡི། །སྐྱེ་བའི་ཡུལ་ནི་རིན་ཆེན་ཚོགས་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་དྲུག་ཡོད་རིན་ཆེན་བཟང་པོ་ཡབ། །དཔལ་རྒྱན་མ་ཞེས་བྱ་བ་རྒྱལ་བའི་ཡུམ། །སྲས་པོ་འཇིགས་མེད་དུལ་བ་རིམ་གྲོ་པ། །ཡོན་ཏན་ཚོགས་ཞེས་བྱ་བ་མཁས་པ་སྟེ། །སྟོན་པ་མཐའ་ཡས་པ་ནི་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་རྩ་དྲུག་སྟེ། །དགྲ་བཅོམ་དེ་དག་ཐམས་ཅད་བསམ་གཏན་པ། །ཐེར་འབུམ་ཕྲག་ནི་བཅུ་བཅུ་འབྱུང་བར་འགྱུར། །རྒྱལ་བའི་སྐུ་ཚེ་ལོ་གྲངས་ཁྲི་ཡང་ཡིན། །འགོག་པར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་ཉི་ཁྲི་སུམ་སྟོང་བར་དུ་གནས། །རྒྱལ་བའི་མཆོད་རྟེན་སྐུ་གདུང་བཅས་པ་གཅིག །དཔག་ཚད་གསུམ་པ་ཕྲེང་བ་མཛེས་པ་བཞིན། །མགོན་པོ་དེ་བཞིན་གཤེགས་པ་རྒྱ་མཚོ་ཡི། །སྐྱེ་ཡུལ་མཐུ་རྩལ་སྙིང་པོ་ཞེས་ཀྱང་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བཞི་ཡོད་ཡབ་ནི་ལྷ་དབང་ཡིན། །ཡོན་ཏན་རྒྱ་མཚོ་ཞེས་བྱ་རྒྱལ་བའི་ཡུམ། །སྲས་པོ་རྒྱ་མཚོ་ལེགས་དགའ་རིམ་གྲོ་པ། །ཆུ་ཡི་རྒྱལ་པོ་ལྟ་བུ་བློ་ཅན་ཏེ། །བླ་མེད་ཐོབ་ཅེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་རྩ་དྲུག་སྟེ། །ཀུན་ལའང་མཚོ་ལྟར་གང་བའི་ཡིད་འདྲ་བ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་དགུ་ཁྲི་དགུ་སྟོང་ཡིན། །མཐའ་མེད་བརྙེས་པའི་དམ་པའི་ཆོས་དག་ཀྱང་། །ལོ་གྲངས་བརྒྱད་ཁྲི་ཚང་བའི་བར་དུ་གནས། །རྒྱལ་བ་ཞི་བར་ཕྱིན་པའི་མཆོད་རྟེན་གྲངས། །བྱེ་བ་ཕྲག་ནི་ཉི་ཤུ་རྩ་གཉིས་འབྱུང་། །མགོན་པོ་དེ་བཞིན་གཤེགས་པ་ས་འཛིན་གྱི། །སྐྱེ་བའི་ཡུལ་ནི་ལེགས་པར་དུལ་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད།